上季首季開倉就一鳴驚人的羅富全馬房，今季開鑼戰只派出三駒上陣，分別係「勁無比」、「一舖成名」及「極速駿馬」，但正所謂貴精不貴多，皆因呢三匹馬都極具爭勝機會。先講隻「勁無比」，上季三戰田草直路賽及千二米，名次逐級而上，當中最後一戰千二米跟「蟲草之星」火併僅以頸位屈居亞軍，但雙雙拋離季軍馬「好客本色」三個身位，反映是場高水準好賽績。而呢匹紐西蘭馬今季踏入四歲，晨課所見成熟確實更進一步，尤其是八月廿四日由潘頓試一課泥地一○五○米閘，一起步即見「勁無比」應聲彈出，全程鞍上人扣實任由隻馬自動走，結果以輕鬆姿態掄元，顯見隻馬狀態起得相當理想，今次打王牌上陣，顯然是贏馬交代時候。
至於隻「一舖成名」，屬上季來港三歲澳洲自購馬，上季頭五仗表現冇乜睇頭，但跑到第六仗加個眼罩上去就判若兩駒，喺梁家俊胯下出戰田草千四米，喺二檔起步，大半程留在中後疊位置，最後百餘米至踩油上前，結果終點前力擒「清新動力」，雖然姿態看似艱辛，實則是睇住對手來食，今季隻馬大一歲，在晨課上給人的觀感心智更成熟，好有機會取得跨季連勝。
「勁速駿馬」上季喺新馬賽越跑越好，尤其末仗以兩個幾身位大勝盡顯高質。最近試大閘亦輕易跑得第一名，相信喺三班六十七分起步仍有大把上升空間。
開鑼戰呢三匹羅富全實力馬大家千祈咪走雞。