前兩日馬經傳媒好唔得閒，星期一上從化，逗留一晚，到星期二睇從化馬場訓練機地開幕，開幕完畢。匆匆趕返香港經已是晚上，翌日即進行排位，時間的確緊迫，不過，從化馬場揀個好日子828開幕。除馬會高層外，尚有國內一班官員，十分隆重其事，大家都知道呢個馬場主要目的用作訓練，沙田馬場設備開始陳舊，再唔搵個新馬場分擔一下千多隻馬操練場地，真係會阻礙香港賽馬事業發展。
雖然828呢日乃從化馬場正式開幕日子，其實，呢個馬場經已於七月底開始啟用，九個有份到呢個訓練基地設倉馬房，經已一早安排馬匹上去備戰，好似今次開鑼日咁，有唔少馬匹曾經於從化操練過一段日子，之後再返回香港，然後部署為呢次開鑼日上陣，當然，呢類馬匹如有表現，日後當然可以成為馬迷追捧目標，不過為防走寶，呢次日賽經已有需要留神呢類從化訓練馬匹，例如出戰第二場第五班千六米嘅「好運齊來」（圖左駒）。
呢隻上季養在大摩馬房澳洲周歲馬，去季尾最後一戰，由於評分經已跌到第五班，所以受到馬迷注目，結果被馬房安排跑五班田草千四米，更用到雷神出馬，賠率只得七倍，結果呢場只得第十三名，雖然名次較後，但實際所輸俾頭馬「凱旋號角」只係四個馬位。跑完呢仗，幕後可能經已立定決心，即使有大摩豢養，但亦好希望轉換新環境求突破，結果呢個暑假轉投沈集成馬房，新接手倉主有理冇理，在七月十五至八月廿三日，足足俾呢隻馬在從化操上三十日，期間上個禮拜四仲喺從化試課千二米泥地大閘，以一放到底姿態輕鬆取勝，呢類遲熟馬有個新鮮感，加上從化有個咁好設備基地俾佢訓練，呢次跑千六米，利用佢均速咆法有機會交出令人耳目一新嘅走勢，吼半冷門值得揀佢。