如果時光倒流番上季初，楊明綸已於第三個賽馬日憑呂健威的「萬馬奔騰」開糊，但反觀今季，賽事經已跑過四次，依然未開胡，榜尾四位未開齋騎師，蘇狄雄、楊明綸，祈普敦及吳嘉晉，四大師傅齊追落後，邊個最後開齋，或者未必是吳嘉晉，始終有師傅告東尼射住，時機一到突然神威不出奇。其實，一般情況楊明綸應該比其他三位騎師早日開齋才對，但好可惜，由周日開始，佢要停賽兩日，即係其餘三位騎師，已經有機會比佢先一步開齋，當中祈普敦呢位新郎哥，暑期與女友拉埋天窗後，現時要積極搵銀，為奶粉錢籌謀，跑過三幾個賽馬日唔對路後，現正積極搵馬房支持，能得實力坐騎，鄉里倉以外，華籍倉當然也不放過，羅富全馬房的「錶之寶寶」（圖303號），今戰二班一千米，最終被祈普敦取得策騎權，雖然這一仗有不少強手列陣，但以「錶之寶寶」的質素及實力，配合羅富全的練馬功夫，有機會給祈普敦開齋的機會。「錶之寶寶」上季首戰由潘頓騎，初出經已不乏捧場票，僅是匹八倍馬，跑田草千二米，中段搶出一程末段無以為繼，翌仗潘頓放棄披甲，轉手祈普敦一試，結果這仗爆出廿一倍冷腳，稍後再由祈普敦騎，依然可取得第三名，由於祈普敦騎過兩仗此駒，最終只得位置交出，但未達到贏馬目標，最後潘頓搶回策騎權，並於一場泥地千二米，以三個半馬位輕取「精算閃擊」開齋。
踏入今季「錶之寶寶」更趨成熟，上周五彈泥閘，祈普敦末段狂追潘頓所騎的「滿地可」，後者雖然放得暢順，但「錶之寶實」也追得悅目，其實潘頓今次揀騎「滿地可」未必是錯，不過，同場「錶之寶寶」狀態一樣出色，一人難分兩身下，「錶之寶寶」才有機會落回祈普敦手上，這位新郎哥能否開齋，真係要睇呢隻「錶之寶寶」。