季內每次夜賽多數有頭馬贏的沈集成馬房，今次夜賽又有兩駒要留神，分別係「勁飛勁」（圖10號）及「育成寶貝」，喺周一排位朝，馬房安排兩駒於馬房行石地，「勁飛勁」由副練王志偉策踱，至於「育成寶貝」則由巫顯東親自試，倉主企在一旁細心觀察，「勁飛勁」火氣十足，副練要抽實韁繩，小心翼翼；至於「育成寶貝」，季初跑過一場谷草一千米熱身後，馬身肌肉收得結實，狀態比起上場可以話靚得多，當巫顯東替「育成寶貝」行完石地，倉主在他身旁不忘教路，對於今次出戰千二米似乎滿肚密圈。
陽明滿滿急求交代
拜神呢家嘢，真係唔好唔信邪，韋達上個禮拜揸住架積架同太太到車公廟拜神，佢仲誠心到求埋籤，當然佢攞住支籤鬼識睇咩，不過，韋達同佢太太經已唔係第一次拜車公，搵番相熟解籤佬指點迷津，宜家有唔少解籤佬都識番書講英文，所以難唔到韋達，結果真係十分靈驗，周一國慶賽即韋達停賽前一戰，俾佢替大摩隻「蓋世之寶」取勝，總算皇天不負有心人。雖然今次夜賽韋達經已冇份上陣，但點解會提到佢？原來又係與車公有關，今季蘇偉賢養馬爆晒倉，成績應該會唔錯，不過開鑼至今僅贏得三場，跑得第二名竟多達七次，比例上似乎唔多啱，倉主都猛搖頭，唯有借助神靈，到車公廟打個白鴿轉，好似韋達咁希望即時旺一旺佢。咁又好難怪蘇偉賢咁緊張，因為睇睇今次夜賽賢廄所列陣馬匹，四隻之中有三隻有贏馬餐士，分別係「陽明滿滿」、「旅遊智者」及「八十八十」，除咗隻「歡樂家庭」目前進度仲未得住。
講番周一最後試跑朝一個特別鏡頭俾大家聽，倉主安排「陽明滿滿」、「八十八十」及「旅遊智者」於馬房地堂踱步，「陽明滿滿」梁家俊、「八十八十」副練、「旅遊智者」外籍助手，三駒於地堂踱步，倉主就喺欄邊睇到實，踱步完畢，倉主與梁家俊雞啄唔斷，可能時間太緊迫，騎練各有事情要辦，於是昨日又相約一早於馬房見面，倉主更找工作人員預備早餐，與梁家俊會面時邊食早餐邊商討軍情，一連兩日倉主與梁家俊出現咁緊張嘅鏡頭，今次佢哋合作嘅戰馬顯然有計。
今次蘇偉賢布陣，四駒中有三匹是實力馬，梁家俊分別替「陽明滿滿」及「旅遊智者」披甲，後者最近一戰換上梁家俊只以短頭鬥輸俾「馬奇財」，另外「陽明滿滿」上季喺谷草千二米由何澤堯跑得第二名，呢兩駒本來都係何澤堯之嫡系馬，今季雙雙易手給梁家俊跑，新接手當然會打醒十二分精神交出成績。
八十八十明益沈拿
至於由沈拿所騎嘅「八十八十」，潘頓上次替牠贏馬，今次他卻揀了方廄「同進」披甲，其實因為今晚潘頓有一手方廄惡馬上陣，「同進」亦是由他騎開，所以順便接埋聘約，今次「八十八十」基本上並非潘頓棄騎，只是一早應承了方廄多駒於今次夜賽上陣，沈拿才獲得今次「八十八十」的主帥權，呢位仁兄可以話冷手執個熱煎堆。