葉楚航季初戰馬起得快，即使用賴維銘搏馬，亦跑得有聲有色，相信呢一個搏馬浪仍會持續一排，馬房有啲馬真係擺明車馬去鍊，好似隻「深愛」咁，季初搏過兩場唔掂，於是馬房轉埋場地、轉埋騎師用潘頓去鍊，雖然只得第二名，但證明咗呢個華籍倉備戰工夫極為正面，絕對唔係整色整水做戲嗰隻，好似呢次夜賽咁，「良才」（圖12號）與「狀元才」一對父子兵馬，都係部署今次夜賽出擊，「良才」與「狀元才」，前者由梁麟炳父親擁有，後駒「狀元才」係由兒子梁冠華擁有，「良才」今次一樣用番上次跑位置嘅李寶利，至於「狀元才」，則是季內初出，馬房用番上季騎開呢隻馬嘅韋達操刀，兩隻馬部署都好有誠意，不過「狀元才」近兩季贏馬有條路捉，就係一定係翌仗，好似前季，首戰跑場田草千四米，其實呢個路程之前贏過，但該仗卻無戰功，不過跑完呢場熱身賽後，翌仗跑谷草千二米即補中。又好似上季，首戰即爭谷草千二米，但只得第四名，大家可以賴排十一檔，結果又要再出先至可以補中成功，今次出戰谷草千二米，係好有搶胡誠意，不過成與敗都係差一場熱身，值唔值得捧場，就要視乎馬迷點樣睇。不過「良才」季內初出跑田草千二米，呢個路程正是隻馬上季開齋路程，臨場八倍比預期好分，結果真係跑得唔好，輸咗呢仗馬房原庄配搭，用番李寶利轉戰谷草一千米，初跑谷草一千米以為幕後欠信心捧場，但大家可以睇睇隻馬臨場啲飛數，由8.1倍落到5.7倍，比起季內初出跑贏馬千二米路程顯然更有信心，結果呢場跑入一席第三名，雖然未竟全功，但由呢仗可以話俾大家聽，幕後對呢隻馬跑谷草一千米係十分有信心，上場着綠格出擊失手，呢次再來，李寶利必會替馬房本利歸還，值得追多一次。