何澤堯今季真犀利，華將能一日四捷的確唔簡單，上周末分別以呂健威及徐雨石馬房戰駒四喜臨門，這位華將越來越受本地練馬師支持及信任。當中何澤堯與呂健威合作得最愉快，現時呂健威六場頭馬中，有五場係出自何澤堯胯下，僅得一匹「紫電明珠」係由潘明輝贏，如果照此路數，未來日子呢個馬房大部分戰馬，何澤堯都有機會獲帥權。所以變相有啲騎師，與呂健威有合作關係者，呢個階段就要打醒十二分精神，因為如果演出稍為唔理想，幕後一聲換人，坐騎就好容易落到何澤堯胯下。周日大部分騎師都放假，但楊明綸卻一早出現喺呂健威馬房，原來專程來睇「活力名駒」及「傳奇」，後者算是嫡系坐騎，現時仲係季初階段，尚可保住帥權，不過咁，有何澤堯嘅威脅，楊明綸要繼續喺呂健威馬房獲實力坐騎，真係要醒定啲，難怪周日假期，佢都要入呂廄睇馬。「傳奇」上季喺谷草千二米取得兩捷，均是喺四班取得，一場由潘頓贏，另一場由綸仔操刀，季尾上到三班，馬房再安排隻馬跑多場田草千二米，結果得第五名而回。但今季返回谷草千二米列陣，雖然又係跑三班賽，但可以喺楊明綸胯下獲殿，演出確有進步，輸俾頭馬「最驫」只係兩個馬位，其實呢場走勢可以見到「傳奇」進步緊，要喺三班建功只係時間問題。上周四楊明綸替呢隻馬與廄侶「活力名駒」彈課草地細閘，全程火車頭咁自己搶衝，呢次再度列陣谷草千二米應該有本錢補中。