呢個禮拜六跑七草三泥，三場泥地戰均是千二米，以往泥地賽如果前段跟唔住，要靠後上食胡係非常蝕底，但今季跑過七場泥地賽，五場為千二米，另兩場屬一哩，呢五場短途賽頭馬多數是後上贏馬，反而一放到底只有一隻「香江穩勝」，所以今次三場泥地賽，大家睇吓點揀心水。不過，嗰場二班千二米泥地賽，唔理「上簽」用乜跑法，要捧一定第一隻先揀佢，點解睇得隻馬咁高，其實，呢場有好多都係路程專家，「豹子頭」呢個路程跑五次得四冠一亞，從未甩過Q，另外「錶之寶寶」，上季開齋路程就係泥地千二米，可以拋離第二名「精算閃擊」三個半馬位，證明泥地性能有番咁上下，又如「上簽」，六戰泥地千二米交出五W，可以見到實力幾咁強，但咁多隻馬中，大家有冇發覺，全部都跟潘頓有關，即使冇泥地根據嘅「好吉利」，基本上亦係潘頓嫡系坐騎，今次咁多隻好馬突然出戰同一路程，「上簽」勝算有幾高大家可想而知。講真「上簽」去季六戰泥地，之前五仗全部贏晒，跑到最後一戰，隻馬終頂唔順大敗，其實，賽前倉內手足已覺呢隻馬唔多妥，胃口跟神態冇以前咁好，果然俾佢哋估到呢隻馬死火。馬房面對現實，六月尾已安排隻馬抖暑，經過暑期休養生息，九月份才真正進入打磨期嘅「上簽」再現朝氣，潘頓專登同呢隻馬兩試泥地閘，一次得第二名，最近一課以一放到底姿態取勝，所以今次列陣嘅「上簽」，在此足有再勝條件。