霍利時隻「夢想飛翔」，本來經已報咗名今次周日跑四班一哩，但星期三早上，被發現死喺馬格內，事後要送獸醫處檢驗死因，最後所得報告乃內臟有血管爆裂，最後亦成為隻馬死亡嘅原因，而呢隻馬周日再無機會爭取連捷。
其實，呢單嘢係有前因，喺本周二朝早，馬房安排呢隻「夢想飛翔」由外籍助手快跳，大約七點十五分左右，「夢想飛翔」按照計劃做工夫，但好衰唔衰，當呢隻馬轉入直路仲有四百米左右路程衝嘅時候，跑道旁突然間有群雀飛過，「夢想飛翔」當時被嚇了一跳，隨即人仰馬翻倒地，之後經過獸醫作初步診斷，認為呢匹馬無事，但相隔一日即產生併發症死亡，的確令人難以想像。
夜賽期間，有記者趁霍利時贏隻「快閃的」後，立刻走去作個短暫式訪問，霍利時將事件嘅來龍去脈交代清楚，好彩就係冇影響到贏馬嘅運程，否則呢次霍利時真係要傷腦筋去重新部署之餘，仲要花時間安慰一下「夢想飛翔」嘅幕後。霍廄趁贏隻「快閃的」嘅氣勢，今周日又部署強兵準備開飯，其中最令人注目就係該匹跑第九場三班一哩嘅「情趣」，隻馬季內經已跑谷草一哩第二次，走勢麻麻哋，純因為呢隻馬需要熱身先至會有表現，今次馬房再安排呢隻馬跑谷草一哩，屬明智抉擇，事關呢隻馬到現時一共贏過四場，兩場贏田草中距離，一場係千四米；另一場係千六米，而谷草一哩亦有兩捷威威成績，大家可以查一查呢隻馬經過季內熱身賽後嘅備戰過程，大部分時間都係由副練薛順強打磨，除星期日休假例外，所以論狀態經已回復番全盛時期嘅水準。今次馬房安排咗由田泰安掛帥，呢位騎師亦曾替呢隻馬贏過谷草一哩，嗰場就係贏「鋒芒畢露」，足見呢隻馬喺三班屬略超之輩，相信霍利時頭馬可以繼續來。