今次周日賽事，由於沙田開始種冬草關係，所以賽事轉到跑馬地進行，大家可以見到排位表上有「七十七十」及「八十八十」兩匹馬名，大家咪以為呢兩匹係同主馬，其實「七十七十」乃蘇凱榮所擁有，「八十八十」則由李運強夫婦擁有，兩駒馬主其實係好老友。李運強亦有匹「五十五十」養喺何良倉，兩家人仲有匹團體馬「咪走寶」養喺何插A所以兩家甚有淵緣。今次「七十七十」及「八十八十」一齊出戰谷戰，是巧合抑或是約定，只有幕後人至知。養喺蘇偉賢馬房嘅「八十八十」，前仗由潘頓勝出谷草千二米，再出因潘頓棄騎而改由沈拿操刀，最後未能連捷，今次再戰贏馬路程，因潘頓同沈拿停賽而易配史卓豐，屆時機會得個估字。不過「七十七十」今次冇贏馬功臣潘頓在陣，改由何澤堯操刀爭第五場四班千二米，寧願棄下周日贏馬路程而提前出賽。當然「七十七十」係無贏谷草千二米嘅成績，但過往也曾跑過一次，這次一出便立刻取得第三名，只係輸俾「精算八方」同「超能量」，本身跑谷戰嘅實力絕對唔曳，再睇上仗「七十七十」贏馬嘅過程，末段可以爆出一段強勁衝刺，強如「龍串鳳」亦要俯首稱臣，後者再出即喺田草千二米輕易補中，倘若練馬師係穩陣派，下個星期日係莎莎婦女銀袋日，適逢潘頓復出，「七十七十」如在此時出戰四班千二米，一定係信心十足，幕後既然向難度挑戰，相信呢匹質新當打馬谷戰絕對有信心謀取勝仗。