日本馬壇下半年嘅大賽期，來自世界各地高手雲集，加上杜滿萊及李慕華兩位長駐外籍騎師，真係異常精彩，而呢班外籍好手頻頻交出好表現，好似現任東瀛一哥李慕華，今年已經贏走六場一級大賽，尚欠一場就打破一年贏一級賽最多嘅紀錄，而愛爾蘭好手歐道樂啱啱亦憑「守諾言」揚威二級賽阿根廷盃。至於盛傳即將回港做蔡廄主帥嘅莫雷拉，就更加唔使講，連日贏馬搞到當地土炮人見人怕。周日將轉播女皇伊利沙伯二世紀念盃，難得三冠雌馬「杏目」唔吼呢場馬女戰，相信雷神一定想把握機會打破齋缽。雷神今戰將會夥拍上場喺府中雌馬錦標力逼「迪雅卓」嘅「雍容白荷」上陣，照計實力都唔錯，可惜呢匹四歲馬女向來冇乜大賽運，此前曾於阪神兩歲雌馬錦標、櫻花賞、秋華賞同維多利亞一哩賽四度跑獲亞軍，騎者可唔可以達成贏日本一級賽夢，都要睇吓過唔過到二奶呢關。至於同場幾位外籍騎師都分獲實力馬嘅帥權，好似杜滿萊就會策騎衛冕嘅「魔族之鳥」、李慕華就有紫苑錦標盟主「樸素無華」，加埋由杜滿樂操刀嘅秋華賞季軍「輕柔流暢」，如果到時真係構成一條外籍騎師四重彩就真係一時佳話喇。
回說香港馬圈，星期六跑馬每月舉行一次，十一月十日沙田馬場設有十場日馬賽事，場數兩泥八草，草地以全闊A跑道進行。騎師方面，何澤堯、蘇狄雄及梁家俊周六繼續停賽，至於黃皓楠、潘明輝、何澤堯及郭能早前均曾不小心策騎被罰，將由月中或月底開始停賽。特別彩池之中，周末三T及六寶獎皆有多寶累積。當日賽事焦點非練馬師麥菲文莫屬，這位澳洲籍練馬師經已辭職將返國謀生，周六是其在港告別戰，報名四駒全列正選，計有「競駿飛鷹」、「老實人」（圖7號）、「安喜」及「愛馬劍」，除「老實人」外，餘駒上賽俱跑第二，表現及狀態皆好，今次可助麥廄在解散前勝出頭馬。其實，麥菲文忽然劈炮似是突然，但想深一層又不太令人意外，嚴格來說，這可能對練者本身是最明智的一個決定。當然，理由一定要說得動聽，「希望多些時間在澳洲陪伴子女」是麥菲文給官方理由，至於官方以外的傳言，還包括因為不能搬離奧運馬房感到不高興，會對其的練馬事業有影響，當然，麥菲文還可以埋怨運氣欠佳，初來埗到即遇上罕有的行馬機意外便是最佳例子，但如若訪問一百位馬迷，估計對其評價都不會高，簡單來說，兩個字「唔掂」，應是馬迷心中最平均的意見了。