早輪發生潘頓彈劾利敬國騎「千金一諾」掌握步速差，連馬都被撬埋嚟騎，最後贏埋出嚟，呢個打擊對利敬國都幾大，好彩君子報仇十年未晚，上周三利敬國以霍廄「正本雄心」力挫潘頓大熱門馬「鄉村瑰寶」，總算挽回面子。利敬國EQ高，將俾人彈劾一番說話轉化為贏馬動力，相信日後會得到更多練馬師重用。
不過現時形勢，確又係鬥唔過潘頓，畢竟潘頓有番咁上下身手之餘，仲有好多鄉里練馬師支持，只要佢出到聲攞馬騎，好少鄉里練馬師都唔會拒絕，好似今次第六場四班一哩列陣嘅「馬到成功」（圖9號），上場配利敬國跑谷草一哩，臨場有六倍半，因為同場黃皓楠嘅「悅目星光」瘋狂落飛，另一匹臨場大熱門馬「陽明高高」，本來是廿五蚊馬，最後亦回番上廿九蚊開跑，結果「悅目星光」真係飛到馬到，由十倍落到五倍一擊得手，大熱門「陽明高高」交回一席第二名，算係有成績交出，而呢隻由利敬國騎嘅「馬到成功」亦走入一席第三名，整體來講，「馬到成功」贏唔到馬亦情有可願，利敬國交番一席位置，亦可以話有交代，但今次佢再無機會為「馬到成功」效力，因為，今次再戰，隻馬已俾潘頓取得策騎權，利敬國又俾潘頓撬走一隻實力馬。雖然呢次潘頓冇擺到明開口唱人而攞策騎權咁低手法，但以潘頓跟賀賢關係，相信隨時講一聲，呢個馬房十居其九戰馬，潘頓都有優先揀騎資格，大家睇睇賀賢與潘頓今季合作成績，兩者季內到目前為止有十五次合作紀錄，所得成績係四冠兩亞兩季，僅七場不入三甲，基本上賀賢交得俾潘頓騎嘅馬，過半數有上名成績交出。所以既然潘頓開到口要賀賢俾呢隻馬佢騎，顯然佢亦相信「馬到成功」跑谷草一哩是有贏馬本錢，大家又不妨睇睇呢場潘頓又騎高利敬國幾多。