今季大摩成績麻麻哋，但最近摩太重新整頓廄務，對打料師要求更嚴格，但唔知係咪嗰個打料師唔掂，定係自己唔撈，最終摩太都冇用佢，呢位打料員最後去咗姚本輝馬房當馬伕。換完打料師嘅摩插A上周日就連中三元，分別以「美麗傳承」贏馬會一哩錦標；「鷹雄」捧走中銀理財馬會盃；「薈力之城」又順利連捷。全日跑十場馬，大摩贏三場捧兩盃，盃王美譽又重現江湖，大摩呢期轉運，唔通真係關打料師事。正所謂旺開就旺，大摩周三派精兵攻谷戰，其中喺第七場出戰三班一哩嘅「合拍威龍」最值得留意。「合拍飛龍」最近兩仗跑谷草一哩均得第六名，一次輸三個餘身位，另一次輸兩個餘身位，前次由麥偉利騎，排一檔起步即扯大纜，居內欄留到尾二位置，轉彎入直路踩油，本來已跟上前列馬「加州更好」，但後者入直路未幾即急劇墮退，影響所及麥偉利要抽實避開，延遲發力下取得第六名。最近一場換韋達執韁，雖然起步冇刻意力留，但入直路守好位下，竟然遇上「活力名駒」及「川河領駒」嘅三文治擠碰，今次韋達在最後三百米作出大力勒避，結果群駒幾乎過晒終點至能發力，最終追回不少失地，只是以兩個餘馬位輸俾頭馬「放眼量」。如果照正常推斷，假如這兩場「合拍威龍」直路無受到擠阻，應該是匹三甲必入爭勝分子，今次大摩再安排隻馬由韋達執韁，相信鞍上人經已知道隻馬特性，到時會發揮出隻馬真正威力，贏得頭馬而回。