剛憑「紅星」贏得在港第一百場頭馬嘅李寶利，近期手風的確旺，葉楚航亦識跟紅頂白，「紅星」雖然由黃俊贏完，但幕後發覺用大師傅依然有再捷本錢，就揀配李寶利而唔用潘頓，姑勿論如何，跑馬係邪門，李寶利近期旺氣迫人，多用亦無妨，起碼賠率唔使因用潘頓而變得過分熱。當然，李寶利受練馬師器重嘅原因除手氣轉旺外，仲有一樣就係聽教聽話，大家仲記唔記得上次「鴻圖機會」點樣跑，該日佢跑田草二千米，在此之前，「鴻圖機會」季內經已跑過兩仗，均由李寶利騎得一冠一亞，上場用番李寶利跑係順理成章，不過李寶利就改變跑法，用搶前守好位，而且跟喺前列跑嘅時間唔慢，最終用放大鏡都搵唔到個影，賽後李寶利更要被小組查詢跑法，明眼人事後睇呢件事，容天鵬馬房嗰場除出「鴻圖機會」外，仲有隻「乘勝追擊」列陣，結果「乘勝追擊」用最佳留前鬥後嘅跑法取得一席第三名，所以「鴻圖機會」嗰場實際作用，顯然係開路先鋒，而李寶利亦甘於替「乘勝追擊」開路，多少都知道嗰場「鴻圖機會」即使打硬仗，得勝機會亦唔會高，所以至做個順水人情。今次「鴻圖機會」出戰第四場四班千六米，論路程季內曾經取得一席第二名，回氣完畢後係最佳爭勝機會，但季內替隻馬跑過三場嘅李寶利，今次唔騎，而揀騎文廄嘅「開懷大少」，後者近仗跑千六米僅影相獲亞軍，今次再來，相信李寶利已有信心幫隻馬復前失。