莫雷拉上次嚟香港跑「旺蝦王」，期間佢知道有一日牌照玩，所以騎「旺蝦王」之外，仲四處搵其他坐騎，例如羅富全隻「歡樂之光」，又俾佢擸到嚟騎，大家都知道香港馬圈競爭激烈，即使你係天皇都假，如果唔一早搵坐騎，基本上啲好馬經已俾人攞晒嚟騎，所以身在日本嘅雷神，騎「旺蝦王」當日，所有其他坐騎都係自己打電話刮返嚟，當然除咗蔡約翰馬房嗰幾隻外，咁高級數騎師都要搞成咁，真係人情冷暖。當然，除贏蔡廄「旺蝦王」及「精算風暴」外，就只有呂健威隻「威進駒」能令雷神多增添一場頭馬，叫做錦上添花。其他馬房該日交俾雷神上陣嘅坐騎，全都係實力麻麻貨色，呢種就係人在人情在，當你個人唔喺度，邊有咁多筍嘢關照你。
講時講，點解會講雷神呢個人，話說騎「旺蝦王」前幾個禮拜，雷神經已四圍發散佢網絡力量搵馬騎，佢喺威哥呢個倉搵到隻實力馬「威進駒」支持，其實，同一時間佢仲問埋威哥攞「陽光」跑，因為最近一場由潘騎騎大熱門倒灶，雷神希望威哥俾「陽光」佢試吓。當日無疑有兩場四班賽，不過威哥表示，一場係千二米草地短途，另一場係泥地一哩，兩項路程都唔適合「陽光」發揮，所以婉拒雷神要求，終於「陽光」等到今次日賽有四班千六米至列陣，不過由於幕後有心飛起潘頓，雖然雷神卜唔到嚟騎，但經已有多位騎師向呂健威索騎，當中包括有蘇兆輝同韋達，結果近期人氣急升嘅蘇兆輝受到幕後垂青。
大家睇睇現時兩位公司騎師嘅身手，巴度同蘇兆輝，所贏嘅馬均存有難度，尤其近期蘇兆輝所贏嘅「鷹雄」及「歡喜心」俱顯功架，難怪幕後一見到蘇兆輝有意思索騎，便即考慮用佢上陣，希望求變之下能令「陽光」有個耳目一新嘅演出。