香港國際賽經歷逾三十年歷史，錦標由最初嘅一個，演變至今成為四項一級賽，見證香港馬圈不斷進步。日本馬初期並唔熱衷參與香港國際賽，但隨着�哋經濟環境冇以前咁好，賽馬事業見到邊度有錢搵就去邊度，上屆日本隊派八駒來港出戰，結果只得兩駒上名，算是無功而回，今年兵力有增冇減，有九駒來港角逐四項錦標，每關起碼有兩駒列陣，希望創做佳績。有日本朋友話，四關中最有信心係香港盃呢一關，列陣嘅一對日本馬「迪雅卓」及「白日彗星」都有機會染指香港盃，其中由李慕華所騎「迪雅卓」更係呼聲最高一駒。「迪雅卓」迄今在日本係匹七勝頭馬嘅高班賽駒，上年攻下一級賽秋華賞，今年三月角逐一級賽杜拜草地大賽得季軍，其後取得兩連勝，其中一仗為十月一項千八米二級賽。本來接着該月份有場天皇賞一級可供呢隻馬參戰，但馬房考慮到對手太強所以決定避戰，一心留力揀跑呢場香港盃，因為到目前為止，真正日本嘅一級好馬，例如「杏目」之流，又點會吼呢場香港盃，所以幕後左計右計，跑呢場香港盃，只要計準香港對手實力便有機會贏馬。今次「迪雅卓」嘅鞍上人係李慕華，佢正因為要騎此駒，相隔五年先至肯再來港披甲，所以係非常重視「迪雅卓」。再睇國際騎師錦標賽，兩位日本代表武豊跟李慕華，拚搏程度都未見實牙實齒，如果想見佢哋真工夫，今次國際賽日，佢哋替旗下嘅日本馬出戰，就會見到真正嘅身手。