今屆四項國際賽全是港隊天下，分別出自三個馬房，包括告東尼馬房嘅香港瓶、大摩馬房嘅香港一哩錦標、羅富全馬房嘅香港短途錦標及香港盃，美中不足就係冇蔡約翰份，畢竟告東尼、大摩同蔡約翰都係贏國際賽嘅常客，今次締造歷史嘅一刻，少了蔡約翰似乎有多少失色，不過大家視「紅衣醒神」係蔡神仙訓練亦可，因為隻馬係上屆香港短途錦標嘅盟主，今季由蔡約翰馬房加盟羅富全，兩師徒嘅關係亦師亦友，「紅衣醒神」投入羅富全倉無傷無病，唔使三兩個月嘅時間就完全磨利槍頭攻堅，能夠訓練出隻馬嘅短途威力，蔡神仙亦要記一功。雖然蔡神仙國際賽未有頭馬交出，但主帥雷神立即替支持佢嘅馬主起個孖，「翠龍」從千軍萬馬中力挫大冷馬「百獸王」取勝，之後又以「精算風暴」起孖，呢位蔡廄主帥，首日履新即交出兩場頭馬，來緊嘅日子大家可將佢作為捧場對象。呢次夜賽，蔡廄實力馬有限，當中只有一匹新勝馬「歡喜心」最值得留意，今次再跑新勝嘅谷草一哩，以目前大勇水準係有力再下一城。「歡喜心」上仗由蘇兆輝重啟勝門，過程十分輕鬆，由此仗可以證明隻馬已克服咗三班。查上季曾經三捷谷草一哩，全部喺四班取得，先係由蔡明紹開齋，後再由雷神打疊贏兩場，後期升到三班作賽就再冇交出頭馬，直到最近一仗配蘇兆輝先至再現光芒，今次落番雷神手上，查隻馬上季有打疊贏嘅紀錄，所以大家對隻馬嘅寶尾當然唔怕追。