有時跑馬都係要講手風順唔順，近期韋達可以話手風順到不得了，今季因為有大摩支持，常有頭馬進帳，有時仲有分頭，好似上個禮拜尾場贏隻「安騏」咁，臨場由18倍落到13倍，果然飛到馬到。最近呢次夜賽，跑尾場何良馬房隻「與龍共舞」，獨贏賠率徘徊喺七至八倍之間，結果真係有料到，全程韋達吊住潘頓「琴心星」為假想敵，入到直路點知「劍追風」先至屬真命天子發難，好彩都係講句韋達有運，終點前一步影贏對手，所以，跑馬幾時都要講運，冇運起上嚟，雷神出馬都冇符。
講番韋達呢位十三屆冠軍，今周日終於有個罕見場合出現，就係佢有三隻馬喺同一場合可以選擇，呢個場合就係第八場由第三班跑千二米短途賽，「肥仔」、「老實人」同「安喜」（圖1號），「老實人」屬麥廄收山馬，贏完後轉入霍利時馬房，講交情霍利時向來跟韋達有計傾，所以要攞番主帥權一定冇問題，但韋達推庄唔騎，至於另外一匹「肥仔」，今季兩戰都係跑谷草千二米，兩次都由韋達操刀，嗰兩次賽前都有消息話搏命，但兩仗只跑第四名，得個追字，今次馬房安排隻馬出戰田草千二米，正常計數，更啱呢隻馬追，點知韋達一樣唔吼，最後獨鍾情騎大摩馬房「安」系馬「安喜」上陣。「安喜」與「安騏」同主，麥廄散倉齊齊轉投大摩馬房，大摩肯接收嘅轉倉馬，當然有番咁上下質素，「安騏」經已屬一例。至於「安喜」季內一出即勝，升回三班上名後，最近一仗無影，絕對唔表示呢隻馬唔夠卡士，因為上手練馬師屬老麥，再數老麥前一手係容天鵬，呢隻馬仲有幾多喺手，暫未可確定，但知道韋達唔騎新勝「老實人」，再推埋兩仗走得近，狀態正在冒起嘅「肥仔」，大家追住呢隻「安喜」捧場相信都唔會有錯。