大家仲記唔記得，上季何華麟有機會在港再贏頭馬，全靠佢姐夫羅富全隻「遨遊神駒」帶挈，當然，騎師除要有倉主支持，亦要得馬主同意至得，好似「時時精綵」就係最佳例子，倉主推荐用何澤堯，但馬主要用潘頓，最終呢場頭馬就落入潘頓手。講起呢匹「遨遊神駒」嘅幕後，知道何華麟嗰日跑港澳盃嚟港客串，就將配搭交由倉主揸旗，大家互信下促使何華麟有個美好回憶。可見幕後跟倉主交情非淺，而呢隻馬平時一舉一動操練情況羅富全亦特別操心，早幾日馬房安排「遨遊神駒」往泳池游水，副練知道阿頭緊張呢匹馬，亦特意唔用馬房領班監督，寧願親自押運。不過，羅富全依然未放心，堅持跟副練一齊到泳池睇「遨遊神駒」游水，倉主指監督游水亦可以睇到馬匹狀態進展，因為如有好狀態嘅馬匹，上水嘅時候係非常好力，不然，爬上水時身體便會東拉西斜難找平衡。今次「遨遊神駒」列陣喺第十一場跑三班千四米，從季內所見呢隻馬所跑嘅兩場賽事，季內初戰跑田草千二米，由潘頓騎臨場殺聲震天，只係匹三倍大熱門，結果只得第六名，未能出擊成功，翌仗換巴度跑回贏馬路程千四米，今次更只係跑得第十一名，輸四位一俾頭馬「發財先生」，賽後鞍上人指因為沿途呢隻馬被馬群頂出三疊角逐，末段無以為繼先至跑得如此差勁，今次隻馬換上梁家俊跑，此位華將跑羅富全嘅馬係特別醒神，「遨遊神駒」或者特別夾華將亦未定，今次值得再追。