大摩剛周日憑「不覊的風」及「標準猴王」起孖，「不覊的風」馬主喜歡張國榮，所以將愛駒改咗呢個名，但養喺麥菲文時一籌莫展，散倉後轉入大摩，第二仗便帶來頭馬，難怪勝出頭馬後，馬主喺凱旋門上不停唱不覊的風。至於替大摩起孖嘅「標準猴王」，係當日潘頓嘅第五場頭馬，亦係佢喺港嘅第九百W，所以，呢場勝利對潘頓來講係標誌着一個里程碑。今季嘅大摩，主力出擊嘅馬匹大部分都放喺韋達身上，當然有一啲難發揮嘅馬則例外，好似隻「標準猴王」咁，最終要出動潘頓先至再贏。呢次夜賽由於跑全泥宴，大摩僅派三駒上陣，當中「軍力勁」同「新力風」都係用蘇兆輝出馬，算係實力分子，而「西域猴王」就用蔡明紹，機會似乎弱咗啲。不過整體來講，大摩呢次能爭勝嘅籌碼唔多，否則亦唔會刻意強配蘇兆輝。其實，以今季「軍力勁」嘅表現，韋達披甲跑兩次泥地千二米均取勝，最近一場跑谷草千二米用史卓豐亦能上名，今次跑最拿手嘅泥地千二米，只要用番韋達執韁，已有本錢再贏，但韋達同場之中，卻揀咗蘇偉賢馬房嘅「添好運」（圖2號）披甲，呢位十三屆冠軍，現時揀馬上陣係無寶不落，既然可以放棄得「軍力勁」，後者今次相信係有三甲機會，那麼今場「添好運」嘅機會應喺「軍力勁」之上。從季內「添好運」兩戰嘅走勢所見，最近一仗喺泥地千二米取得上名成績，反映近況經已復甦，上季因隻馬嘅評分長期留喺二班作賽，整季未有表現可以理解，今季可以獲得重新降回三班上陣，評分跟班次重回有利水準，韋達喺一匹從二班降回三班作賽嘅「添好運」，與一匹由四班升上三班跑嘅「軍力勁」，兩駒當中作出選擇，很自然會選擇騎「添好運」，今場嘅頭馬，「添好運」當然係勝算較高嘅一匹。