一啲唔係經常可以贏到嘅馬，葉楚航都會絞盡腦汁，想盡辦法替隻馬打開勝利之門，好似今次有份列陣嘅兩隻四班馬「暴風俠」同「放馬過來」，前者由容天鵬馬房轉入葉廄，新練馬師接手後連續兩仗用潘頓出擊，先喺谷草千二米跑得近，再出安排增程跑千四米即手到拿來。又好似嗰隻「放馬過來」咁，上季喺三班贏田草千八米，但一直跑到今季降落四班仍久久未有頭馬出現，近三仗馬房刻意用上唔同類型騎師策騎，分別係巴度、史卓豐同蘇兆煇，結果由蘇兆輝喺田草二千米建功，馬房用心部署，呢啲難贏嘅馬最終順利交出頭馬。
今次周日「暴風俠」同「放馬過來」依然有份列陣，續以贏馬組合再戰，應該有機會再增添頭馬進帳，不過，喺呢次葉廄戰馬部署嘅過程所見，機會最突出都係嗰匹第二場第五班千四米嘅「盛勢」。季內七戰雖然無功，上仗重新降落五班作賽，用賴維銘跑谷草一千米，雖未有走勢可言，但今次馬房安排隻馬出戰田草千四米，鞍上人卻換上潘頓，由呢個配搭顯示，今次嘅「盛勢」係有打硬仗決心。呢隻馬過往由潘頓騎過一次，除今次外，對上一次騎已係上季尾嘅事，亦係隻馬上季嘅最後一戰，跑田草千四米，當時以首次降落五班嘅身份跑田草千四米，由潘頓首次執韁，結果順利以兩個馬位輕勝「銘記心中」，從贏馬姿態所見，隻馬千四米實力的確係非一般五班馬可以抵擋得住。最近一仗，「盛勢」經已重新降番落五班上陣，但馬房未有即時安排隻馬出戰最煞食嘅千四米，而係出戰一場未合腳法嘅谷草一千米，並由賴維銘出戰，似乎有恃班底之利喺非拿手路程謀冷，可惜馬房如意算盤未能打響，今次先至正頭正路用番潘頓策騎，呢對贏馬組合屆時又可發揮出作用了。