四班落五班分分鐘鹹魚會翻生，今季跑出一條四班降五班千多元冷Q，呢條就是「西域猴王」搭「領闖者」，兩隻從未入過三甲嘅馬，降落五班就脫胎換骨。舉出上述呢條Q係想講四降五班馬幾咁惡，今次喺第一場五班角逐千二米泥地蘇保羅新馬「財帥」，值得大家另眼相看，隻馬今季由麥菲文轉投蘇保羅馬房，上季跑咗三仗，連同今季在麥廄散倉前所跑嘅三場，合共六戰全不入三甲。今季蘇保羅接手「財帥」，未有太心急安排上陣，距上仗出賽日期，差唔多近三個月至派隻馬出戰，所揀嘅路程係泥地千二米，當然大家對呢匹過往從未跑過泥地嘅馬會缺欠信心，但呢次蘇保羅嘅安排應該唔會無的放矢，睇吓「財帥」嘅血統背景，兄弟馬中有「勁快步」及「王者再現」泥地曾上名，而馬房喺十二月二十日由黃皓楠試過一課千二米泥地閘，走位6 7 8，雖然全程跟跑，只係鞍上人未肯騎一步，大家如果再深入查究，隻馬曾喺八月及九月份期間，當時仍然係由麥菲文豢養，曾經試過兩課泥地大閘，都係由韋達考驗，其中一課係試一○五○米，走位2 1 1，以三個幾身位輕勝第二名馬「加州精英」，另一課則係千二米，走位1 1 1。鞍上人韋達一放到底，輕勝「金碧輝煌」及「歡樂之光」等馬，所以今次隻馬降班即跑泥地賽，顯然係精心嘅部署，最近嘅一課大閘，擺明係馬房示人以弱嘅手法，今次用黃俊跑，刻意減磅更顯誠意，呢隻冷馬應該博得過。