■聽審不忘打卡，咖喱飯配血饅頭。 fb截圖反對派長期縱「獨」，以前尚會遮遮掩掩戴頭盔，扮吓嘢「譴責」旺角暴亂，但現在為了吸「獨」票，就個個走去吹捧「旺暴」嘅始作俑者「本土民主前線」前發言人獨琦（梁天琦）。早兩日，獨琦要喺涉及砵蘭街暴動嘅重審中作供，民主黨嘅癲峯（許智峯），「新民主同盟」嘅咖喱飯（范國威）就高調喺fb話畀大家聽佢哋去咗聽審。癲峯仲要話「香港人撐硬你們」咁講。唔少網民狠批癲峯自封香港人代表，仲質問佢：「你支持掟磚，燒野（嘢），打警察？」有人就揶揄呢班人永遠都係叫人衝、自己鬆，「下次記得叫埋你仔女喺前面喎！」
獨琦此前被控在前年2月8日至9日參與砵蘭街的暴動，在前年2月9日在亞皆老街參與暴動、襲警、煽惑暴動等罪名。高等法院去年中裁定獨琦前年2月9日在亞皆老街參與暴動的罪名成立，但他與同案被告李諾文、盧建民及林傲軒被控於2月8日至9日參與砵蘭街的暴動罪，陪審團就未能達成大比數裁決。
呢單案今年重審，近日輪到獨琦作供。喺舊年立法會新界東補選時話會為暴徒提供支援嘅咖喱飯，當選後就一直俾人鬧冇兌現選舉承諾--梗係啦，講兩句好易啫，要畀錢就難啲囉，尤其是佢都當選咗咯，唔通你收返啲票咩？有銀都留返嚟蛇齋餅糉啦！不過，打卡呢樣嘢就話咁易嘞。
佢前日喺fb發帖，話俾人知佢同吳靄儀、梁國雄、楊岳橋、陳淑莊、羅冠聰、邵家臻同許智峯前日有去聽審。大概佢都知自己太冇口齒，怕人唔信，所以要發埋張入座證嘅相嚟證明佢真係「到此一遊」。
網民：撐掟燒搶的不代表我
經常喺區議會搞「抗爭」阻撓會議進行，舊年仲狼胎到搶手機嘅癲峯呢，就轉發咗獨琦喺審訊中作供嘅新聞，仲話：「你們要頂住！香港人撐硬你們。」「Joe Wu」就留言狠批：「香港人撐硬佢？你代表香港人？如果係真，為何唔見大量香港人出來支持佢？你支持掟磚，燒野（嘢），打警察？你是議員？你是基督徒？」
「Cheung Wai Hung」亦話：「請許先生講清楚，佢代表邊啲香港人講話撐呢班暴徒呀......請許先生唔好立亂代表香港人講嘢呀，我相信好多香港人無授權你㗎。」「Ming Fok」就揶揄：「佢（癲峯）話撐硬你哋受靶呀！」
「Siu Wai」就睇唔過眼呢啲「矯情嘅賤人」：「香港地呃飯食嘅人多的是， 就算係議員都唔係（例）外， 把口話支持，到叫佢行到最前就縮陽， 個個都係得把口， 幣（弊）在真係有傻仔信， 真係要坐監自己攞嚟！」「Gunboon Tsoi」也道：「下次記得叫埋你仔女喺前面喎！！」
明嘅，今年區議會選舉，癲峯同咖喱飯都係區議員，而且佢哋個黨大把人要選，但越來越多理性市民唔受佢哋枝（支）笛，所以就轉而吸「獨」囉。
「獨」友：割晒席啦吔屎啦
不過，班「獨」友都唔係傻仔。「Kin Ng」就回帶當年傳統反對派曾經公開譴責過旺暴，「×，飯民當時割晒蓆窩（喎）。」「Pak Kei Wong」亦道：「食屎啦飯民，你地（哋）最冇資格講！」
■香港文匯報記者 陳川