■連熱狗也恥笑「投票都係新聞」。 fb截圖立法會議員有出席會議同投票竟然係新聞？話說立法會人事編制小組委員會前日開會，討論政府提出保留西九文化區等3個編外職位嘅建議，結果以3票對兩票否決，其中1票反對就係由公民黨嘅黨魁戇橋（楊岳橋）投下。《蘋果日報》就好似執到寶咁，大字標題《保留西九3職位遭否決 岳少成關鍵一席》吹奏佢。有網民就揶揄，「楊岳橋有投票係新聞？」有人突破盲腸，話今年係區議會選舉，出年就係立法會選舉，所以戇橋先會出嚟交戲，「好快又會現形。」
成個傳統反對派喺立法會新界東補選時，猛咁吹奏戇橋係「關鍵一席」，一旦當選咗就貨不對辦囉，剩係計呢兩年，無論係傳統反對派提出用特權法查選舉事務處電腦失竊案，財務委員會表決沙中線追加撥款，甚至自己喺立法會大會提出要提「檢討單程證」制度嘅動議，結果全部no show，俾人恥笑係「關鍵缺席」至啱。
前日人事編制小組委員會開會，討論民政事務局有關保留西九文化區等3個編外職位嘅建議。喺表決時，會議只有5個人在場，包括身為主席嘅葉劉淑儀，民建聯嘅黃定光同周浩鼎，公民黨嘅郭家麒同譚文豪，唔夠法定人數，所以就鳴鐘叫議員返會議廳。結果戇橋嚟到，喺主席一般唔投票嘅情況下，佢同另外兩個黨友齊投反對票，結果否決咗政府建議。
戇橋成日缺席俾人鬧，皇帝唔急太監都急啦。戇橋今次「竟然有投票」，佢自己唔出聲，但公民黨以至作為反對派喉舌嘅《蘋果》，當然要大肆吹奏啦。公民黨就喺fb以「公民黨關鍵3票成功否決西九撥款項目」為題發帖，《蘋果》就喺即時新聞度大字標題《保留西九3職位遭否決 岳少成關鍵一席》嚟吹奏戇橋。
「事不關鍵也FF 選舉近扮悔改」
「熱狗」嘅梁逸朗喺睇完呢單新聞後發帖寸爆：「楊岳橋有投票係新聞；楊岳橋有投票先係新聞。」「Ah Kwong Lam」揶揄：「一時唔偷雞做保長。」「李昌少」就「敬告」《蘋果》唔好FF：「開幾個位又唔趕又唔關鍵又唔係惡法，否決到有咩咁勁？」
「Kung Ming Leung」則點破戇橋點解會出嚟交戲：「2020近了，岳橋想扮悔改。」「Julie Han」話：「風物長宜放眼量，佢好快又會現形。」
■香港文匯報記者 陳川