■左起：成員Carman、Queena和Odilia熱舞。香港文匯報訊（記者 莎莉）女子組合Bingo趁「婦女節」當日推出新歌《後街女孩》，事隔一年推出全新廣東跳舞歌的她們都表示興奮又緊張，因為今次歌曲概念對比以往歌曲特別，玩味更重。此歌概念源於一個日本動漫，以最紅《抖音》熱播歌曲當中的健康舞蹈及「食雞」遊戲中的動作去改編，動作簡單易記。
對於今次拍MV的感受，成員Carman說︰「係跳舞跳咗足足七粒鐘，頭髮同衫褲都濕透晒，濕到好似啱啱淋完雨咁！拍MV中途，公司同事叫我哋扮啲麻甩嘅動作配合返首歌個主題，點知原來做返自己就係麻甩，連公司同事都話我好適合行麻甩路線。同埋，今次有男主角參與拍攝，令到MV更加好玩及有趣味性。」而成員Odilia就話：「有機會手持槍械拍攝，因為我好鍾意打槍Game減壓，今次可扮槍手，一償所願，應該型過食雞遊戲入面啲人物，哈哈！同埋自己怕有水腫，在前一晚唔敢食太多嘢，搞到肚餓瞓唔着。」
至於，新成員Queena表示︰「今次係我加入Bingo的第一個MV，好多人話我『眼大無神』，平時自己就沒有太多留意，但在鏡頭前就顯露無遺。尤其是拍大頭和面部表情時，眼要識講說話，我就好像停了機一樣。導演一直在旁邊配音，指導我做表情和動作，最後自己看回自己覺得很搞笑。」當日她們在摩星嶺山上取景拍攝，而出名勁惹蚊的Queena因着住短褲，事前已搽咗蚊怕水都被蚊咬到一撻撻，笑言搞到執相時竟然最多就係蚊瘌，真是慘慘豬﹗