蘇兆輝在三月六日谷草夜馬，跑到半途因腰背傷患退下火線，預早買晒過關嘅注項凍過水，買咗吽u騎師王」更加即時宣布投降，輸錢之餘仲要一肚氣。跟住三月十日沙田日賽，當日成手惡馬嘅囥O日表現就不似預期，除咗頭場以匹大熱門「有理共想」順利贏馬，之後成手馬越跑越無影，全日幾隻公眾大熱倒灶而回，捧佢場馬迷真係俾佢攪到暈得一陣陣。蘇兆輝親口向馬會承認上次夜馬中途唔跑，係因為陣上覺得身體唔妥，呢類腰背傷患係咪三幾日間可以百分百痊癒，要專家先有權威答案。就算及時傷癒，騎師有冇足夠狀態發揮本身應有水準亦係問題，推騎時就住就住，平時幾狠幾重嘅神鞭都必定大打折扣。
蘇兆輝表現走樣有冇受傷患影響，佢自己先知，馬迷賽前只有靠估，最大鑊係蘇兆輝係孭重飛嘅大騎師，雖然月初夜馬跑到一半退場，的而且確，家陣馬會規定受傷騎師要經過醫生檢查，肯定冇問題先可以出賽。亦可以肯定騎師唔會夾硬唔得都死頂上陣，好似「八太子」（圖前駒）早前贏馬臨場換蘇兆輝，楊明綸明知贏面咁高嘅馬都一樣放棄，唔得就唔得，唔到你逞強。問題好多時反而係騎師以為自己跑得，到跑落至發覺唔係嗰回事。其實馬會係咪可以喺保障投注人方面做多少少？例如規定凡係陣上墮馬或賽事期間身體不適嘅騎師，喺嚟緊一次賽事一律暫停出賽一次，等騎師有多幾日時間復元及回復狀態。規矩始終係馬會定，如果做得嚴格啲可以加強保障投注人，就絕對值得。
另一方面，準練馬師韋達之前先飛去杜拜，踏出學嘢之旅第一步，目前正在英國，之後再轉到澳洲，預算六月返港正式開檔，雖然話係咁話，冇理由前一個月先埋班，所以佢人在他方已搵定員工，有咗雛形遲吓埋班就易得多，而副練呢個主要角色，原本已搵咗蘇保羅旗下嘅魯柏軒攜手，不過魯柏軒竟然推庄，變咗要重新物色，至於點解佢唔走？義氣兩個字講晒。大家都知道，魯柏軒騎師出身，退居幕後幾年，表面上同韋達大纜扯唔埋，斷估韋達亦唔會知道佢嘅工作能力，點解會忽然被睇中，咁梗係幕後有猛人俾料，而韋達又言聽計從；其實做得馬房管理層，就如副練或者領班，馬會都有人暗中睇住，邊個有心做，邊個無心錯漏百出，一一都心中有數，魯柏軒轉做副練年資唔算長，但好有心機，同何良馬房嘅副練梁明偉同屬退役騎師嘅培訓重點，咁韋達要人，魯柏軒就成為推薦對象，但魯柏軒心諗蘇保羅向來好信任自己，今後馬房仍要力爭上游，點好意思喺馬房要人之際，見異思遷行咗去？就係咁，先謝絕韋達及有關方面好意，決定留低在蘇廄繼續打江山。