周日兩場五班賽無重心可言，唯一可以信任就係兩位超級大師傅莫雷拉或潘頓嘅坐騎，希望憑佢哋高些少嘅騎功而贏到對手。不過，由超級大師傅贏完嘅五班馬，再出就唔可以用嗰場贏馬嘅賽績去衡量隻馬嘅實力，因為五班馬演出如果係咁準繩，咁就唔係五班馬，師父教落，五班馬唔係傷殘就係老弱，四肢健全無病無痛嘅五班馬，質素唔會高得去邊。以第一場五班千四米葉楚航隻「勁飛寶寶」為例，上場配潘頓跑同一路程，好輕鬆咁贏第二名馬「越跑越有」個幾馬位，大家若有睇過上場呢隻馬點贏，咁嘅姿態，加上本身只係隻五歲馬，正值壯年，冇理由今次潘頓唔再騎，隻馬今次由蘇兆輝披甲，唔通真係人間有情，潘頓讓俾蘇兆輝作送行馬？講真，「勁飛寶寶」以往都有過唔好底子，贏完馬後再出影都冇，上季呢隻馬就喺梁家俊胯下贏完千四米後，一直沉到落五班先至再贏，呢隻馬有幾可靠大家心中有數，再睇呢場馬潘頓竟然騎蘇保羅隻「凱旋星光」，咁即係講，「凱旋星光」呢次爭勝機會一定喺「勁飛寶寶」之上。大家先睇睇前次「凱旋星光」由利敬國出戰千四米，跟「盛勢」鬥到影相分高下，雖然終點前被「盛勢」擒咗，但如果講走勢，「盛勢」喺內欄出唔到嘅話，頭馬就會係「凱旋星光」，呢次潘頓向幕後索騎，以佢贏過「盛勢」嘅表現，再計一計「凱旋星既」嘅分量，今次唔再騎「勁飛寶寶」，證明「凱旋星光」係有贏面。