上季配何華麟勝出嘅「遨遊神駒」，今季嘅演出就平平無奇，季內至今仍未有三甲成績交出，不過，呢個團體嘅成員馬匹，逐漸增強了曝光率，早前喺容天鵬馬房勝出嘅「遨遊之星」，馬主程志輝就係「遨遊神駒」嘅團體成員之一，而自己所擁有嘅「遨遊之星」，表現如此出色，佢亦估唔到。對於愛駒首季能取勝，佢非常高興，而上周四晚，佢喺馬會會所擺了四圍，宴請容廄上下員工，齊齊分享佢贏馬喜悅嘅心情。
這邊廂剛擺過慶功宴，今周日又見「遨遊」系出馬，呢匹就係「遨遊戰士」，馬主係程俊華，也即係「遨遊神駒」馬主日月輝煌賽馬團體嘅經理人，呢家人喜用「遨遊」系列命名，至於呢匹「遨遊戰士」並唔係放喺羅富全馬房，亦唔係養喺容天鵬馬房，而係姚本輝個倉，幕後交遊廣闊，將戰駒四處投放，希望練馬師能使出真本領，吸引佢哋更多嘅新馬投入。
假如話「遨遊之星」今季在蘇兆輝胯下贏田草千二表現犀利，這匹「遨遊戰士」更為出眾，隻馬由去年十一月底開始作熱身工夫，短短三個月時間，經已谷起狀態列陣，期間所試嘅三課大閘，可以話令人眼前一亮，第一課大閘係由梁家俊試八百米，喺一月二十二日進行，走位1 1 2，與「星叻」拍實過終點，只輸一個短頭，接住第二課大閘，改試一千米直路閘，由田泰安喺二月十二日試，走位1 1 1，以按韁姿態輕勝第二名馬「福喜多多」四個身位。最近一課，即第三課，喺三月五日由田泰安考驗，走位1 1 1，結果以六位三輕勝第二名馬「極速前進」，之前兩課大閘，與較多新馬試，所以成績難以作準，今次跟一隻有過四班作賽經驗嘅「極速前進」一比，試大閘如此輕鬆彈離對方，難怪今次上陣跑田草一米，田泰安連贏開嘅「正本開心」都推庄唔騎。