早排方廄成績麻麻，不過最近呢次夜賽，方仔又再發威，先以「真跑得」贏馬，再憑「捉金皇」起個孖寶，突然間成績咁威水，原來有因，早幾個禮拜前，方嘉柏個倉要進行髹油，所有馬匹需轉到告達理舊址，待馬房髹油完畢先至搬番原址。最近呢次起孖寶咁威水，就係所有馬匹搬番到舊倉，馬匹返到最悉熟嘅地方，一下子就發揮出應有嘅威力。今次日賽，相信方廄佳績會繼續嚟。今次再由何澤堯披甲，出戰第五場第四班千八米嘅「精彩飛動」，以現時嘅進度，相信係四班難留嘅馬。上場隻馬轉入方廄首次列陣，跑谷草一哩，末段力擒「活力勇士」嘅走勢，基本上後駒只有捱打分兒，直路鬥衝期間從未有反撲嘅本錢。本來呢隻馬剛周三夜戰有贏過嘅四班一哩可報，但馬房因為安排「捉金皇」喺呢場搏殺，決定將隻「精彩飛動」轉戰沙田闊場千八米。大家會擔心「精彩飛動」突然增程百多二百米會否及時適應，呢個問題大家可以放心，因為翻查呢隻馬未來港前嘅賽績，最後一仗係跑到二千米長途，僅以一馬頭之微屈居第二名，如今所跑嘅只係千八米，本身韌力可以支持到二千米，呢個賽績，反而了解到為何「精彩飛動」要讓出谷草一哩俾廄侶「捉金皇」建功，皆因本身需要增程發展。因為再跑落去嘅話，一哩賽程根本並非呢隻馬最佳嘅射程，馬房部署如此有見地，這匹質素超四班嘅中長途好手，今次又有一展身手嘅機會，料可順利連勝。