黃俊近期旺到發紫，最近夜賽起個孖，先以「衝亞」贏馬捧盃，再憑「實力飛駒」爆出十倍冷門，一個見習生贏馬數目可以拍得住同晚嘅一哥潘頓，的確唔簡單。當然，能夠贏馬最大功勞並非騎技，只因仲有七磅可減，實力馬搵佢披甲，就有事半功倍嘅妙效。由於現時見習生唔多，黃俊搶手程度絕不比大師傅潘頓遜色，要搵小伙子上陣，冇一早卜定嘅，只能碰碰運氣，幸好今次有位新一期見習生陳嘉熙登場，十磅仔出自羅富全馬房，師父喜得愛徒，聲聲要悉心栽培，說真一句，羅富全未落心機栽培呢位後生仔前，馬會經已俾佢放洋學藝嘅機會。
大家先睇睇小伙子嘅履歷，陳嘉熙自二○一五年四月開始喺紐西蘭接受見習騎師訓練，先後喺基督城和新普利茅斯跟隨練馬師麥其應和施樂克學藝。在紐西蘭合共上陣四百六十九次，勝出四十九場賽事。並於二○一七年十二月轉到南澳洲繼續習騎，最初跟隨萬富圍練馬師簡利華，其後轉投練馬師奧干納門下接受指導，其間合共出賽六百零三次，取得五十一場頭馬。總括而言，陳嘉熙在海外從騎期間合共贏得一百場頭馬，勝出率接近百分之十。一位海外騎師，經已勝出逾百場頭馬，返港以見習騎師身分策騎，並有十磅可減，如此着數嘅條件，點會唔成才，羅富全只可以話錦上添花，呢位小伙子當見習生期間，只係睇吓宒l造出甚麼佳績而已。陳嘉熙處女下海首戰，師父提供兩駒，一匹係「安定繁盛」，另一匹係「勁無比」（圖2號），前者係俾小伙子熱身，因班次低必排喺前面場合，後駒係二班賽，必定排喺下半場，隻馬跑最拿手嘅千四米，呢個路程四戰得兩冠一季一殿，今次用陳嘉熙負一○七磅，跑季軍算僅合格，獲亞算係稱職，贏出先至係最滿意嘅賽果。