蔡約翰對一啲馬主特別念舊，好似「大軍閥」呢位馬主，以前養有「鈦金剛」同「好味皇」等，除養馬有運氣外，更係逢出必拚。好似「大軍閥」初出排十四檔跑千二米一樣照搏，幸運哋遇「銀紙」跑得奇差，結果俾「大軍閥」一出即爆。上周三夜賽蔡廄贏隻「好利運來」，呢隻馬嘅馬主以前養有「好利威」，又係蔡約翰訓練出來嘅出色戰駒，亦屬鬥志鮮明一族。今次又有件綵衣馬迷非常眼熟，不過，好耐冇拉過頭馬，就係隻「極速神驅」，以往養有「愛神」同「熱剛力」等，已係許怡年代嘅事，後期與太太養過馬放喺蔡插A可惜未贏過馬。今次呢隻「極速神驅」再養喺蔡約翰馬房，希望能一圓拉頭馬美夢。呢隻馬比起普通嘅馬起碼大一個碼，因為隻馬體重達千三磅，跑短途係相當着數，所以最初嘅兩仗，馬房都係安排隻馬跑沙田闊場，首戰跑直路賽，不足兩倍馬僅得第七名，再出跑田草千二米，呢次得第五名而回，所輸距離由首次跑一千米嘅四個餘身位，縮短到跑田草千二米嘅兩個餘馬位，明顯粗身大馬經已越跑越進步。本來呢類馬再度安排跑闊場短途賽係最有利，不過，蔡約翰卻專登安排隻馬出戰谷草千二米，顯然幕後深信以呢隻馬嘅質素，安排跑谷戰應該係匹超級馬，再睇呢隻馬嘅部署過程，呢隻馬已一早試過谷草一千米大閘，以高速放入第四名，今次由莫雷拉操刀，頭段必定搶到領放位置，以隻馬咁大步，末段對手要過牠就唔係咁易。