將於五月廿五日星期六舉行的克蘭芝一哩賽，香港共有四駒報名，除了上年冠軍「川河尊駒」外，尚有「平湖之星」、「跳出香港」及「星洲司令」。另外，六月初安田就有馬王「美麗傳承」準備報名，早前郭氏搞慶功宴，與大摩異口同聲，都話睇埋月尾冠軍一哩先再決定，再下一步六月下旬，日本另一戰寶塚記念反而更清晰，告仔旗下的「時時精綵」好大機會成行，當然睇埋五月遮打盃先作實。上年「明月千里」寶塚記念跑第二，當時大摩曾指出「時時精綵」及「大雄圖」都很適合跑呢場，如今「大雄圖」回流英國，咁「時時精綵」又點呢，原來告東尼都有意思計劃跑寶塚，但大前提係日本馬會容許多匹馬陪「時時精綵」啟程。派馬海外遠征練馬師梗有所盤算，記得「明月千里」上年前往，自己留在檢疫馬房，好在有人陪，但點都唔及有馬相伴，起碼情緒都會穩定啲，最重要係「時時精綵」咁有卡士，日本馬會都想佢參戰，所以呢個條件極大機會接受。
另一方面，霍利時副練薛順強下季將加盟韋達，呢單消息近日在圈內瘋傳，雖然一切仍有待牌委會六月公布，但霍利時新副練人選都有埋，佢係霍廄內部調升嘅戴兆麟，佢係早幾年孫達志副練，自從孫達志散倉，佢就埋唔到班，先去文家良再轉霍利時，據悉呢個後生仔好務實，當初亦冇因為燉冬菇放慢手腳，依家時機一到又有機會歸位。講真，今時今日馬房唔算多，副練個位好矜貴，自上星期薛順強落實跟韋達，兩位自知已失勢嘅副練，即時致電霍利時傾偈，不過戴兆麟喺霍廄領班一職做得好，霍利時最鍾意佢，同自己一樣埋頭苦幹，另一方面，現任徐雨石馬房第二副練，跟李易達多年嘅黃志雄，下季將會轉去蘇偉賢，取代現任副練鍾占祺，仲有一個未經證實，係現任賀賢第二副練余詠詩，有望加盟一個本地倉做番正式副練。講番薛順強，佢本身係紅褲子出身，騎操得工作又細心，兩大賣點都啱韋達口味，更重要一點係暫時所知，韋達基地好有可能喺奧運馬房，小強在霍廄多時，既熟晒架埗，拿揑到啲馬去機坪運動量同人手安排，到時咁開倉就易辦好多，所以同韋達傾咗好短時間已一拍即合，未來進一步交出表現，三幾季之後，就有權獨當一面。