第五場、第三班、一二○○米。「嶺寶峰」五歲英國自購馬，在英國時由高仕登訓練，曾經出賽八次獲兩冠一亞兩季，兩場贏馬都係千二米短途直路賽，父系為前英國七月盃盟主「美城」，同母半姊「女貴族」曾勝出兩項一級賽；「嶺寶峰」來港初期曾因左前腿不良於行影響進度，之後養回健康已恢復正常出賽頻率，在港只跑過六場，暫時係龍係蟲尚未知，但上次走勢已教人眼前一亮，今次如有分頭值得一試。
第七場、第二班、一六五○米。馬主蘇啟聲買入今年意大利打吡冠軍「共創歡樂」，是由「狂舞派」馬主周邦華介紹買入；此駒在上年五月時贏二千二百米意大利打吡時一放而回，氣量非常充足，相信牠會是一匹長途馬，今次在港初出一哩正合發揮，揀谷戰避開沙田強手相當明智；已退役的蘇啟聲團體馬「咪走寶」，上季養在何廄四捷，今次雙方再度合作肯定充滿搏殺默契。
第八場、第三班、一六五○米。容天鵬馬房升班而臨的「狂舞派」值得再追，此駒插班初出同程以冷門七十三倍跑入一席第三名，相隔一場於剛仗即以熱門身份輕鬆補中而回，同主以往「危險英駿」及「危險人物」不時爆冷得手，但「狂舞派」卻是熱食開糊，四歲仔連番交出驚人後勁，今次列陣尾場，內欄場地經連番踐踏後估計好追，負輕磅依然相當好衝，宜多加留意為是。