大家有冇發覺自打吡之後，蔡約翰個倉成績麻麻，連莫雷拉表現都係一般，可能有人會諗，因為六月九日後莫雷拉會轉為公司騎師，對蔡廄馬未必咁上心。其實，莫雷拉係一個鬥心非常強悍騎師，隻馬有一定會跑俾大家睇。據知蔡廄近期成績唔理想，與從化訓練基地有關，蔡廄從化負責睇檔嗰位仁兄英文名叫「紐臣」，因為經常喺工作上跟內地員工發生磨擦，馬房惟有調番佢返來香港馬房做番騎馬人，因為咁從化就少咗一人工作，由於短時間仲未搵到適合人選，所以蔡神仙搵現時副練伍鵬志兼任，搞到要從港兩邊走，馬房成績點會唔受影響？雖然蔡廄人手出現變化，但馬房有部分超級馬，只要按正常程序準備及訓練，預計一樣有好成績交出，好似今次再度列陣嘅「美麗滿載」，上仗雖然以鼻位鬥輸俾「加州福星」，但馬房有信心今次可報回一箭仇。除「美麗滿載」外，仲有上場一出即勝嘅「大軍閥」，馬房認為呢匹超班馬再跑四班千二米，連捷應該冇難度。上場呢隻馬初出跑千二米，由於排檔差，即使由莫雷拉跑，一樣係匹十多倍半冷門，不過，正如之前所述，只要馬有，雷神陣上定能交出水準，結果呢匹「大軍閥」喺莫雷拉出色嘅搶閘工夫下，起步守喺三疊前列位置，入直路力拒兩匹實力馬而勝出，呢兩匹實力馬係貝力斯所嘅「閃耀榮光」及夏禮賢嘅「銀紙」。今次「大軍閥」獲排到一個較有利嘅十檔，即使加六磅亦無阻其爭取連捷。