反對派為咗自己嘅政治目的，到底可以幾冇人性？港男陳同佳舊年涉嫌喺台灣殺害年僅20歲嘅潘姓女友，事後仲棄屍潛逃返香港，因為兩地冇移交逃犯嘅法理基礎，令到台灣方面冇佢符。特區政府因為受害少女父母嘅請求，決心彌補呢個法律漏洞，但就一再被反對派阻撓，分分鐘拖到個疑犯可以走佬都未定。唔單止咁，「人民力量」快必譚得志前日仲喺網上要求呢對父母同佢哋一齊做政治表態，要求佢哋要跟反對派建議用「日落條款」處理呢件事，否則「偽善政府通過惡法，冤死亡靈無法安息」喎。佢仲話，自己聯絡唔到潘生、潘太，「希望各方好友廣傳」。唔少網民都留言鬧佢食「人血饅頭」，冇人性，仲叫佢唔好再騷擾死者家屬。■香港文匯報記者 甘瑜
曾經公開侮辱婦女嘅快必，前日喺facebook度發帖，向受害少女嘅父母喊話，聲稱「偽善政府通過惡法，冤死亡靈無法安息」，仲要求呢對父母企出嚟同「香港人」一齊「實事求是」，要求政府「只此一次、只限台灣」咁處理呢件事，「真正」還佢哋個女公道喎。
快必自己試過聯絡呢對父母，但聯絡唔到，於是就發起網民搞人，聲言「希望各方好友廣傳」。
佢又話，特首林鄭月娥係「利用」慘案，想乘機「『引渡』在香港的人返大陸」，唔係真心為受害少女沉冤得雪，仲鬧林鄭「食人血饅頭」??。
無視勸止堅持搞人
今時今日網上激進嘅人越嚟越多，佢呢個帖文一出，到噚日已經有200個轉載，仲有近400個like，都有咁上下影響力，唔少網民都叫人幫手搵呢對父母出嚟。
不過，當然都有啲正常網民睇唔過眼佢哋咁嘅舉動。「Elaine Hui」就留言鬧爆︰「搞到無嘢好搞，搞當事人家人？你哋喺人家傷口灑鹽呀！」「Elaine Hui」仲話，人哋已經冇咗個女，仲要俾快必班人攞出嚟公審，俾人指指點點，「佢答應你，於心何忍？不答應你，就對立於全港市民！你又何嘗不是在吃人血饅頭？」快必睇完之後，都仲係唔覺得自己有問題，留言話︰「是政府先以此事為藉口，要幫到件事，就要如此。」
仲有唔少網民都叫佢唔好打擾人。「Lky Fung」話︰「請勿打擾死者家屬。」「Lock Lok」怒斥︰「咁你都做得出，你人格都好有問題。」快必就寸嘴回應︰「 Lock Lok，像你咁蠢，就沒有問題了。」「Lock Lok」都不甘示弱︰「我『咁蠢』都至少尊重人家家屬選擇低調既（嘅）意願，唔會好似你咁出po迫人地（哋）出來重提傷心事。呀『乜必』你咁聰明又選唔到係有原因既（嘅）。」
唔肯聽網民呢啲勸喻不特止，快必仲同其他網民「陰謀論」呢對父母。「WK Tse」問︰「（呢對父母）會否被收買不敢出來？」快必附和話︰「有可能，妖！」
辱人求助民記有「報應」
有啲網民仲越講越難聽，「Andrew De Saruru Chan」話︰「女死者父母搵得民建聯幫手，我無嘢補充囉......」「Elisa Lam」隨即附和︰「原來『報應』來。」「Danny Ho」更衰︰「有咁嘅父母就有咁嘅『後果』。」
呢啲咪就係反對派囉，佢哋話有心幫死者同死者家屬討回公道，你唔係信吖嘛？