日前立法會審議《逃犯條例》修訂嘅法案委員會搞到七國咁亂，成班「飯民」離位、衝擊、搶咪、拉扯、推撞、飛撲，爭啲以為睇錯咗格鬥場。但其實十年前，民主黨同公民黨曾經發表過聯合聲明，話不滿社民連3個議員「動粗干擾會議進程」、「傷害立法會的尊嚴」、「阻礙議會有秩序運作」，仲對此表示「非常遺憾」𠻹。唔少網民都攞返篇嘢恥笑班「飯民」又中回力鏢，仲反問佢哋︰「點解唔譴責自己？」
鴿訟被回帶曾譴責同道
成日狙擊「飯民」嘅「無敵神駒」仇思達前日又發功，喺facebook出咗篇《歷史在笑『民主派』》，貼咗民主黨同公民黨2009年譴責社民連嘅聲明。原來當年仲係社民連立法會議員嘅「長毛」梁國雄、黃毓民、陳偉業喺時任財爺曾俊華宣讀財政預算案時，走去掃跌曾俊華枱面啲嘢，又想搶演辭，長毛仲用書掟中曾俊華𠻹。事隔兩日，民主黨同公民黨就出咗個聲明，批評呢3個人「動粗干擾會議進程」、「傷害立法會的尊嚴」、「阻礙議會有秩序運作」，仲建議立法會議事規則委會員討論事件，「防止此類破壞秩序的行為繼續發生」𠻹。
睇返日前班反對派議員嘅行為，真係「動粗干擾會議進程」、「傷害立法會的尊嚴」、「阻礙議會有秩序運作」樣樣都中，仇思達就抵死地微調啲聲明，由譴責社民連變成譴責「泛民」，又真係完全啱使喎。
網民批無限搬龍門
唔少網民都恥笑呢班反口反到毫無羞恥心嘅泛民。「Conan Ho」簡潔概括︰「回力鏢。」「Patrick Ng」話︰「哈......莫講話十年前，就算五年前嘅事呢班×街都唔知搬幾多次龍門啦。」「Kenny Kwok」質問︰「人地（哋）做就破壞秩序？自己做就伸張正義？」
「Debby Kong」狠批︰「呢班垃圾連雙重標准（準）都已經唔係，係完全冇標準，反正人地（哋）做就係×街，佢地（哋）做就係英雄，人地（哋）做就係搞亂個議會，佢地（哋）做就係為民主。」「Mandus Lau」看透世事咁話︰「戲子黎（嚟）姐（啫）。」「Michael Wong」直情質疑︰「公民黨及民主黨成功消滅社民連並搶埋人家啲票？」唔怪得之唔想長毛選潛在嘅新東補選啦。
「Yau Yau」就話︰「攞番（返）佢哋修改議事規則時大義凜然嘅陳詞出黎（嚟）打面就啱！」呢句說話又幾有啟發性，香港文匯報記者真係睇咗吓，民主黨前主席、時任議員何俊仁當時話，對於有議員喺會議期間行為不檢「感到遺憾」，所以支持事務委員會同法案委員會嘅主席有權趕走啲咁嘅議員，「以免影響立法會尊嚴。」佢仲話，公眾對「會議能否有序、暢順地進行」有期望咁話。
公民黨主席、時任議員梁家傑都有發言，話佢哋個黨同廣大的市民一樣，「我們也很希望能夠保持議會的秩序，亦希望最低限度能夠保證，出席本會會議的政府官員及公眾均不會感到任何壓力，或人身安全受到任何威脅。」
學網民「Chung Ming Lam」話齋︰「（『飯民』今日）點解唔譴責自己。」 ■香港文匯報記者 甘瑜