今個禮拜六港隊有「川河尊駒」同「星洲司令」往新加坡跑克蘭芝一哩賽，呢次亦係「川河尊駒」衛冕戰，上屆呢個錦標由一對港馬包辦，除方廄「川河尊駒」捧得錦標外，第二名也係由港隊馬苗廄嘅「馬上發財」取得，可能苗禮德知道呢個錦標用乜嘢級數嘅馬經已有本錢取勝，所以今屆冇咗「馬上發財」唔緊要，立刻用隻「星洲司令」代替，希望學方仔一樣，有機會一嚐贏星洲大賽嘅滋味。
呢排見方仔星洲同香港兩邊飛，周三早上先見方仔從新加坡返港，晚上即入場督師，當被記者攔住問及「川河尊駒」喺新加坡狀況，據倉主表示一切正常，比預期快適應當地環境，所以對今次衛冕戰係抱樂觀態度。而剛周三夜賽方仔入場，即以「獎進」同「成才」起孖，醒目馬迷睇到網上直播資訊，相信一定搵到啖食。
正如之前所講，方仔周末有馬出戰星洲，但周日本地賽亦不能輕視，其中喺第五班千四米列陣嘅「領闖者」（圖2號），季內曾經降落第五班，即由史卓豐爆十三倍冷門開齋，隨後返回四班列陣，卻又一直乏成績交出，最近幾仗，隻馬評分又再回落到五班角逐，結果大前仗一降番五班跑，即見潘頓索騎出戰，依然係跑開齋路程千四米，只係不敵「旋風腿」得第二名，再出馬房安排牠轉戰泥地千二米，雖然仍由潘頓執韁，但臨場回飛到八倍，由冠軍騎師披甲嘅馬，之前至交出位置成績，呢場臨場賠率冷落已知凶多吉少，結果落敗而回，到咗最近馬房又再安排隻馬跑田草千四米，用上有十磅可減嘅陳嘉熙，這一次賠率不冷落，結果真係飛到馬到，交回一席第三名成績。綜觀季內呢隻馬三戰五班千四米，得冠亞季各一嘅全上名成績，今次仍用上場跑開隻馬嘅陳嘉熙，有力替隻馬取得季內第二場勝仗。