一有新馬賽，大家都會優先留意吓大摩個倉出乜馬，事關歷來新馬場合，經常係大摩世界，好似上季嘅「薈力之城」同「常感恩」，今季一出即勝嘅「忠心勇士」，都係大摩招牌貨，後者初出有幾犀利，相信大家都知道，蹄下敗將「知道必勝」，再出亦可以按韁贏馬，足見「忠心勇士」可媲美「薈力之城」嘅質素。呢類招牌新馬，當然係由大摩個仔喬治幫馬主購入。
講開「忠心勇士」呢類得十幾蚊一面倒獨贏嘅馬，用來投注可以話乏味，對練馬師嚟講，一樣未必夠皮，所以有呢類過關纜躉，馬房必定會有馬配合搏殺，大家可以睇睇上次「忠心勇士」贏馬當日，馬房以「美麗動力」起個孖寶，呢次日賽，馬房除「忠心勇士」外，仲有唔少實力馬列陣，其中尾場嘅「薈力之城」，大家當然要睇，事關呢隻馬正如之前所講，屬喬治上季替馬主穿針引線買入，結果殺到上二班，仲喺三級賽洋紫荊短途錦標跟「旌暉」串Q，雖然之後再無突破，但由此足以證明跑二班賽隻馬一定有利可圖，今次馬房部署「薈力之城」亦顯心思，本來有啱腳法嘅千二米沙田銀瓶可列陣，大家睇睇呢場，大摩竟然冇派馬上陣，向有盃王之稱嘅倉主有實力馬都唔跑盃賽，寧願去試新路程千四米，假如倉主唔係對「薈力之城」有信心，相信唔會咁部署，再睇「薈力之城」父線可以贏到千六米，子嗣普遍有長力，照計「薈力之城」呢次增程應該啱數。