■《法證先鋒IV》再次舉行開鏡拜神儀式，總監製梅小青、高層杜之克及有份演出的黃浩然、譚俊彥、陳煒、鄭俊弘、湯洛雯及陸詩韻等出席。香港文匯報訊（記者 梁靜儀）《法證先鋒IV》因為「安心事件」而需要重拍，昨日再次舉行開鏡拜神儀式，總監製梅小青、高層杜之克及原先有份演出的黃浩然、譚俊彥(Shaun)、陳煒、鄭俊弘及陸詩韻等出席外，取代黃心穎演出記者角色的湯洛雯(靚湯)亦有現身，靚湯又即場跟Shaun演一段對手戲，事後眾演員都表示收貨，和她最多對手戲的黃浩然更主動跟她握手，並說：「多多指教。」
杜之克致辭時說：「同一部劇兩次開鏡及造型，呢個經驗好特別，今年唔止一次仲有另一部劇都係咁樣，好感謝啲同事同團隊喺短時間內重新出發。雖然唔係計劃之中，今次好難得有咁嘅機會，但好多演員好想有得排戲認真去拍令演出更精彩，好肯定再度出發過程比之前做落嘅更好，正面態度，今次精益求精令project出來的效果更好，冇得彈，期待個劇，應該唔會比原先個期遲太多，好快會見到作品出現。」
梅小青多謝演員支持
總監製梅小青表示今次對她來說是第一次嘗試，因排戲很長，好珍惜再度出發的機會，而有這個決定後，很快就收到演員的短訊，他們都表示無論如何都會支持，令自己個心覺得好暖。
劇中黃浩然和心穎對手戲最多，當日爆出「安心事件」後，有傳受影響的浩然嬲到爆粗，問到他心情平復未？他「唉」一聲後說：「今次係真正回應，之前冇刻意回應，因為當事人已經受好大影響，自己唔方便回應太多，加上自己同屋企人放緊假，當時知道件事後係擔心，因為件事唔係一個人，係成個《法證》團隊，擔心個劇出唔到街。」如今劇集重拍，浩然感到開心和感恩，並多謝公司肯重拍，因重拍不是簡單的事，要用很多資源，劇本有改動，所有演員亦要配合才能成就到件事，他自己微不足道，大家一齊才是力量。他又自嘲說：「可能公司覺得我做得唔好，畀多次機會我再拍。」他謂看到網上都好多人支持該劇，像打了強心針，有好大動力。
問到爆粗一事？浩然反問：「點會爆粗，我同邊個爆粗？同廁所爆呀？我係擔心，所以第一時間send短訊畀小青姐問有乜幫手。(有冇嬲心穎？)冇得嬲，我們冇聯絡。(你冇嬲定冇得嬲？)我們冇嬲，件事我們係局外人不便評論。(你都係受害者？)我同佢都係朋友，好難去評論，只係可惜，因為大家努力拍咗冇得播出。(你可惜心穎前途？)不便公開評論。」