潘頓真係贏馬停不了，好似啱啱跑完嘅夜賽咁，潘頓又執四W，呢個情況相信會一直維持到季尾。潘頓上次日賽數六W時，經已憑第二場隻「經典之星」，贏咗一季最高獎金紀錄，舊紀錄係由莫雷拉所締造，以今季潘頓嘅走勢，相信可以遠遠拋離雷神嘅舊紀錄。其實，潘頓今季成績雖然突出，但佢心目中仲有個宏願，就係破莫雷拉一日八W紀錄，呢個紀錄真係唔易破，不過，正如潘頓破雷神一季獎金最高紀錄，佢都可以做到。雷神今季當蔡約翰主帥，好多時候冇得外借，潘頓可以揀晒啲好馬騎，好似呢次日賽咁，跑十場可以場場揀最好嘅馬跑，正所謂成事在人，謀事在天，呢個希望又未必潘頓唔可以做到。佢仲有個積極態度，就係喼住節食，事關佢好想連一啲輕磅馬都騎埋。今周末潘頓胯下惡馬唔少，當中第七場為羅富全披甲嘅三班馬「不可說」就值得注視，由於呢隻馬有腳患問題，遲至今年五月至第一次上陣，由何華麟跑千二米，得第十名輸八個馬位，呢場可當係熱身賽，最緊要就係腳患無復發，未幾即復課打磨，上月底潘頓親替呢隻馬撻課千二米泥地大閘，走位10 10 4，拉士半條直路一鬆，即撲上前取得一席第四名。難怪潘頓垂青呢隻季內只跑過一仗嘅馬，呢隻馬上次跑千二米，倉主都未有真正部署出擊，呢次報回贏馬路程千四米，再出動埋王牌報名，種種跡象都話晒俾大家知，今次「不可說」其實經已向大家講明必定會搏老命。