黃俊早前晨操策「豪霸」，被一匹走脫馬「鑽飾飛龍」撞到墮馬受馬，事後被送進ICU，經過一輪急救，情況經已好轉，亦已搬到正常病房，有小道消息話佢可以同人溝通講話，總算係不幸中之大幸，但應該仲有排抖，事關傷到腦出血，真係唔講得笑，仲要睇復原進度，有行家透露二○一九年賽事都唔使預佢。咁講即係現時馬圈少咗個見習生，只係得番個陳嘉熙，大家都知道有啲馬要減磅至顯出威力，所以陳嘉熙變成稀有動物，練馬師要搵佢上陣，真係要一早卜定，情況真係好似卜潘頓咁難。不過，仲有個危機，就係分分鐘冇見習生可用，好似呢位小伙子咁，上周日騎告東尼隻「加州議長」，排外檔一早切入馬群取位，結果競賽小組要罰佢停賽兩日，亦即係講有兩日呢個馬圈將冇見習生可用，馬房最多只能揀有三磅優惠嘅港產大師傅。呢個問題有機會延續到來季，聽聞馬會已急求解決方案，消息指現時喺澳洲實習咗一年多嘅兩位見習騎師劉泓或勞景暘，有機會提早召番香港上陣，消息指會兩個中揀其一，睇吓發牌小組會揀邊個返香港先，好快會有消息公布。陳嘉熙六月廿六日開始停賽，實力馬喺手必然鍊到盡，當然，佢現時騎技所限，所贏嘅馬全部都以放頭跑法為主，今次大摩隻「大四喜」再起用陳嘉熙，當然希望藉住有十磅減之利，再替呢隻馬贏取今季第二勝。早前黃俊騎呢隻馬贏過田草千二米，輕取「宜春之星」同「多多」，最近呢兩仗改由陳嘉熙披甲，都係跑田草千二米，一場入Q，輸俾「大眾歡呼」，另一場影都冇，雖然成績唔算標青 ，但大摩亦收貨，皆因呢兩場「大四喜」列陣，兩次都係出馬十二匹，呢隻馬都係執個最外嘅十二檔跑，蝕盡條件下陳嘉熙都算跑得唔錯，呢次抽番個一檔，睇嚟呢隻馬可替幕後再增添頭馬成績。