要贏場馬需要運氣配合，好似潘頓咁，現時幾可隻手遮天，連莫雷拉都頂佢唔住，一場馬之中，好多時候都有幾匹實力馬可以揀，咁嘅環境下角逐，點會話唔着數，但牌面高嘅馬陣上未必一定贏，啱啱跑完嘅夜賽就有兩個最佳例子，呢晚潘頓只贏隻「勇福星」，假如唔係有幾隻牌面馬陣上有意外，佢應該可以贏到四場。三場潘頓本可贏得嘅馬，一場係「鴻圖福星」，閘前應該快嘅馬，呢場竟然起步麻麻，早段潘頓要力迫至能跟貼馬群，可能就係起步呢吓失機，結果俾死對頭莫雷拉隻「星日名駒」走甩，最後只得亞軍，賽後解鞍，潘頓用鞭打咗「鴻圖福星」一嘢以作警誡。另外隻「好運」，呢場得第二名都算執番嚟，起步嚴重失蹄，情況就好似安國倫咁，但潘頓眼明手快，抽番起隻馬繼續跑，當然冇呢個意外「好運」贏面自然高好多。最後隻「二郎」，相信大家會喺鏡頭前睇到隻馬搞咗好耐，重新綁脷上陣，但隻馬抵達起步點時已滿口鮮血，假如唔係咁，會唔會輸俾「黃金甲」真係唔敢講，估計應該兩駒會走得更近，唔係入到直路俾對手越放越遠咁樣輸法。無可否認，現今潘頓留放馬匹，真係要豎起大拇指，連莫雷拉都肯定唔係佢嗰皮，好似替大摩隻「帝勝之星」打開勝門咁，末段力拒何澤堯隻「盈華盛甲」，替呢隻處女馬打開勝門，有識馬高手見到潘頓末段只打虛鞭，呢種咪係贏騎功同智慧。今次日賽，沈集成旗下「同樂日」都要搵潘頓幫吓手，呢隻馬上場麥道朗都騎得靚，看台觀眾最後二、三十米，相信冇一個敢話佢會輸，點知莫雷拉騎隻「友瑩囍」跑得更靚，終點前影相贏個短頭真係冇計，所以今次沈集成都要搵潘頓出馬，再同莫雷拉隻「友瑩囍」鍊多次，呢個組合只要跑高半線，就有機會報一箭仇。