鄭俊偉喺剛戰夜賽派十一匹馬參賽，雖然「如沐春風」臨場退出，最終憑隻「公証福將」贏馬，剛好湊足十六場頭馬成功上到岸。鄭俊偉贏完「公証福將」後，接受記者訪問時指出，如果成績唔達標，責任由佢一個人承担，言下之意對自己係好有信心。事實，鄭俊偉季中開始，獲得一些轉倉馬支持，呢隻「公証福將」就係今季由方廄來投，假如無呢批生力軍，的而且確馬房會陷於更惡劣環境去求成績，事實證明來投者亦有眼光，鄭俊偉贏「駿王」及「公証福將」都充分顯示練馬師嘅奶O，所以呢個倉嘅實力分子，時刻都要吼到實，經常會有意料之外收獲。馬季仲有八次就完結，鄭俊偉要打保衛戰，自然要將一大批有可為嘅馬部署喺呢個階段出擊，咪以為贏完「公証福將」後呢個馬房就收工，其實仲有好多秘密武器未出籠，好似今次列陣第十場三班千八米「大道至正」，今季法國自購馬，插二班一直減分到現時三班上陣，倉主雖然一直急求成績，但對呢隻馬依然循正路手法打磨，先俾足夠時間等佢適應香港作賽環境，順便減埋分，落低一班有利安排出擊計劃，查呢隻法國自購馬，來港前贏過千五、千六及千九米，兩場屬沙膠地，一場是大爛地，本身擺明是中長途馬，大家睇睇倉主心思，一直由夏禮賢出賽，希望呢位愛爾蘭籍騎師同呢隻馬多啲溝通，俾足時間人馬適應，所以今次再跑田草千八米，隨時可以替鄭俊偉馬房增添頭馬紀錄。