馬會上周二公布下年度馬匹進口許可證中籤名單，有人快樂有人愁，電盈主席李澤楷首次中籤成為馬主，首富家族起碼三十年冇再養馬，小小超做馬主自然成為焦點，以佢嘅財力引入高質自購馬絕對冇難度，相信佢嘅愛駒稍後會高度備受注目。小小超過去有冇入紙抽馬就唔知，但今季早前嘅冠軍賽馬日就係佢旗下保險公司贊助，轉頭佢就中籤，總難免令人覺得係順水人情。事實係，每季中籤嘅來來去去都係一小撮人，大馬主例中籤之餘，家族成員亦經常受惠好易中，甚而組團體入紙又中，佢哋真金白銀支持馬會，中籤機會高啲都唔係問題。不過，有啲馬主就年年入紙次次食白果，屢敗屢試失望而回。馬會唔俾一啲背景複雜人士做馬主，原因可以理解，有關人士亦自己知自己事，唔會自討沒趣。馬會負責入紙抽馬中籤嘅部門，一直冇透明度可言，現行嘅做法就非常守舊，馬會自行判斷入紙抽籤馬主係咪身家清白，跟手一搥定音判定有冇中籤資格，都無謂爭拗馬會有冇權判斷馬主資格，反而係憑乜認為判斷唔會出錯？時代進步，馬會喺抽馬中籤方面唔通唔可以做多少少？對於被認為有問題嘅馬主，點解唔約佢哋見吓面，係唔得嘅咪叫佢哋日後唔使再入紙，亦俾個機會啲馬主自辯解釋，或者可以釋除誤會，亦唔使浪費大家時間。
另一邊廂，潘頓贏馬停不了，有望打破莫雷拉一季一百七十場頭馬紀錄，但係由馬迷投票選出嘅「最受歡迎騎師」，潘頓就從未當選，間接反映咗馬迷對佢印象麻麻，以佢今季氣勢本來好有機會打破悶局，不過世事難料，無端端又殺出個程咬金，競爭對手仲要係掛靴冇耐嘅賴維銘。賴仔因為「贏馬神器」事件影響，突然宣布掛靴，係人都知係無奈嘅決定，競賽小組由對賴仔提出指控到判罰，成件事嘅處理都令外界非常不滿。自最受歡迎騎師選舉開始接受投票以嚟，好多人已經喺各網上平台呼籲投賴仔一票，務求推到賴仔當選，替佢出返啖氣。華將當選最受歡迎騎師唔係冇前科，早兩季蔣嘉琦票數就壓過當屆冠軍騎師雷神當選，所以今季賴仔當選絕對有可能。馬會亦講明馬迷可以票投賴仔，會視為有效選票，唔會因佢已非現役騎師而不符當選資格。如果最終賴仔當選，馬會都幾尷尬，不過都冇得怪邊個，要怪就怪競賽小組令馬會丟架。即使馬會明知冇面，撇除向馬會表達不滿，事實賴仔係年資最長嘅華將，明知被人玩針對，索性決定退休交返個牌俾馬會，作風瀟灑有骨氣亦確值得馬迷投佢，其實何澤堯本來都係一個理想選擇，今季成績有目共睹，已經贏咗超過半百場馬，魚與熊掌，睇吓最終獎項花落誰家。