■姚子羚沒有任何的遮掩，打開心扉說感情事。豁然面對桃色是非 稱沒做違心事
約姚子羚（Elaine）做專訪，關注點一定是今年5月被傳媒爆出和夜場老闆Raymond拍拖，繼而捲入桃色是非。經過三個月的沉澱，難得姚子羚沒有任何的遮掩，打開心扉說感情事。被指是「小三」，姚子羚強調自己和Raymond拍拖時，雙方均是單身。整件事中，自己沒有做任何違心的事，對得住自己對得住人。至於將來拍拖，姚子羚表示自己從來都比較想要簡單的愛情。
姚子羚的感情路，似乎不太順暢，去年宣佈同前男友「的士邦」分手，結束三年多嘅戀情。之後遇上夜場老闆Raymond，更有疑似床照流出。講真一段感情中，誰對誰錯，旁人沒有資格指指點點，但曾經的枕邊人做了什麼，當事人應該都心知肚明。難得在分手後，Elaine沒有說過對方的不是，而且更勇於出來面對記者，認真抵讚。她說：「其實講返成件事，我沒有做錯，也沒有做過對唔住別人的事，所以出事的即時反應，就是要主動同大家講清楚 。識我姚子羚咁耐的人，絕對相信我的為人，身邊朋友都知道，所以有時候唔解釋，解釋再多會變成是非，倒不如唔好解釋。所以當時所有嘢我都只講一次，之後再有任何是非，我都唔會再講 。」
認為交友就該付出真心
人與人之間講求的是互相的信任，問到Elaine經過今次件事後，會否怕了去認識另一半，又或是識人時會更加小心？她說：「整件事發生了，唔開心一定會有，但係我控制唔到別人，我只能控制自己，發生咪面對，冇乜嘢唔可以面對。整件事中，大家都好錫我，呢啲人生經歷唔係一定唔好，可能得到嘅比失去嘅更多。至於帶眼識人，我其實唔知咩叫帶眼識人，我同任何人交朋友，都係攞個心出嚟，如果我同人做朋友，吓吓怕你謀住我，除咗攰，咁樣交往會變惡性循環，一段關係好難建立，兩個人總要有付出，咪唔好怕蝕底，做乜都好，只要願意付出真心，人哋係會知嘅。如果對方有心騙我，總有方法。至於將來結婚，從來都比較想要簡單的愛情。」
慶幸胡定欣陪伴在旁
而跟好友胡定欣拍攝《包青天之再起風雲》時，在橫店開心相處近2個多月，劇中Elaine與胡定欣因某些原因反目，當中Elaine在劇中的一句話，令雙方喊到收唔到聲，「呢個劇好多喊戲，本身同包大人譚俊彥淚鬥淚，由於轉機位，keep住情緒幾粒鐘，原來譚俊彥係TVB數一數二最喊得男演員，佢好似開水喉咁，喊極都有，我唔可以俾比下去。至於定欣也是如此，我同佢劇中本身係好姊妹，後來有一場戲，佢發現咗一啲事，然後我同佢講我呢一生最開心就係識到妳。講完之後大家嘅情感同淚水已經湧現出來。為拍此劇，我特地飛到橫店拍攝了兩個月的時間，這段時間只能留在橫店拍攝，不能回港做私人的事情，慶幸有好姊妹定欣參與這劇集，令到拍攝期間過得十分愉快。我們經常都收工去睇戲，搵地方去玩，又會煲吓湯，所以拍攝呢兩個月真係好開心。而且發生事，定欣陪喺我身邊，唔需要講好多嘢，只是陪伴，已經令人好安心。」
採攝：植毅儀
Makeup： Henry Li
Hair：Taylor Wan @ Hair Corner
服裝：MURUA@ITHK
場地：ToGather PartyHouse