香港馬圈好自由，唔鍾意屈喺一個地方，可以轉馬房換新環境發展，好似九歲馬「金碧輝煌」，就是現時全港轉倉最多的一駒，此駒一四年首季隸屬霍利時馬房，跑咗三場不勝轉去李易達，但搞咗十場都係贏唔到，之後改投容天鵬門下，三戰得一席亞軍，便再蟬過別枝由呂健威訓練，呢次終於開竅獲三捷，可惜慣於飄泊嘅「金碧輝煌」上季去咗丁仔新倉度，兩獲亞軍唔算太差。「金碧輝煌」連埋外地練馬師訓練，一生係經歷六位練馬師，睇吓呢匹馬壇流浪花會留喺丁廄或是再度出走。合則來不合則去司空見慣，早年多多勁贏團體名下嘅「手到拿來」，最初由李易達訓練，首季六戰得一場位置，翌季轉投容廄進步三級跳，累積四捷合作愉快。上季澳洲自購馬「手到回來」（圖9號），多多勁贏團體選擇跟蘇偉賢首度合作，本應有個好開始，初出在谷草一千上名，但其後只能再添兩席披士，無奈地終止合作關係。多多勁贏團體跟容天鵬再扯上關係，「手到回來」加盟容廄，有心想學同主「手到拿來」大爆發。「手到回來」上季跑得最好是在田草千二獲亞，冠軍「精算風暴」及季軍「百步穿雲」都能征服二班，反映目前「手到回來」輾轉降至三班評七十四分必有反彈空間，值得高度重視。