如果要形容意大利騎師沈拿（圖橙色綵衣）上季嘅遭遇，相信只有「黑仔王」最為適合，事關佢先喺去年十月尾因為踩單車做體能訓練整親，導致髖部骨裂，足足唞咗兩個月先復出。然後去到今年三月尾策騎「競駿飛鷹」行出跑道又有意外，搞到左腳受傷又要休息兩個月，喺全季養傷多過上陣嘅情況下，上季埋單只得六場頭馬，成績當然唔算好，新季佢只獲發牌去到十二月三十一日，換言之只得四個月俾佢爭取表現，先可以繼續在港發展。所以唞暑唔夠一個月，沈拿已經在八月十日回防開工，唞暑期間沈拿主要返回祖家意大利休息，兼且過住飲飲食食嘅生活，好彩體重唔算有太大變動，狀態亦算弗，同埋經過上季受傷事件後，可能都明白運動員唔可以操諸過急，保持健康先係爭取好成績嘅最好方法，估計佢會努力喺頭四個月盡力贏馬，務求續牌去到季尾。另外，由上季尾所見，沈拿經常向今季開倉嘅韋達大送秋波，兼且喺韋達最後谷戰嗰晚，當一眾騎師列隊歡迎十三少時，佢哋兩個仲攬頭攬頸，再加上沈拿首朝開工立即為韋廄操馬，自然令人想到呢位意大利好手新季極有可能獲得韋達支持。不過，香港馬圈好現實，未到最後一分鐘，佢都唔知係咪會得到支持，相信只要做好本分爭取每一個機會，便可盡快入局。