一場所謂「反修例」行動，反到今時今日逼特首林鄭月娥都講咗撤回修例，班人仲唔肯收手，社會上好多人都唔明為乜。但《蘋果日報》日前出咗本總結行動嘅所謂《自由之夏》特刊就畀咗個「答案」大家，就係11月24日區議會選舉要「血債票償」喎。嘩，乜原來係咁樣一回事咩？結果唔少煽暴派網民就鬧爆《蘋果》食人血饅頭，攞「義士」嘅鮮血去換選票咁話。講真，呢啲思想《蘋果》都有份縱容出嚟，想借機拉票結果變成倒米，同暴徒想掟汽油彈結果燒傷自己背脊，一樣咁有異曲同工之妙。
正當有啲反對派網民沉醉喺《蘋果》嗰本特刊整得「好靚」嘅感覺入面，多次俾《蘋果》出賣嘅暴徒、「港獨」分子同激進派同feel（感覺）到唔對路，皆因搞咗咁耐，連場暴動，最終俾《蘋果》以特刊封底嗰個「11．24血債票償」概括，所有嘢最終就係要為「飯民」拉票？雖然「飯民」有咁嘅如意算盤，但當然有好多煽暴派網民都唔認同啦，唔少人都開聲討伐《蘋果》咁厚顏無恥去食人血饅頭。
網民斥攞「勇武」益「飯民」
中大「獨」講師劉正喺伭b專頁「無神論者的巴別塔」就寫咗篇長文，其中提到𠵱家「勇武派」都入唔到閘，即係冇人代表到佢哋，「票償？票乜×嘢償？」佢仲話，今日「勇武派」冒晒風險上街，「然後而（??）家班『飯民』就Spin（扭）到去幫班『飯民』入議會，等佢地（哋）印印腳收幾皮嘢人工兼享各式各樣嘅公權力就叫『還咗血債」？傻×咗？」
fb專頁「北歐心科學」亦話，「血債票償難聽過粗口」，反問咁多「烈士」嘅仇，要用區議會投票去「報」，到底《蘋果》同「飯民」係咪真係「忿怒」同「在乎」件事。「Tina Lau」話︰「響食人血饅頭呢方面，『泛民』絕不手軟。」有暴力到底嘅網民就話，要「血債血償」先得，睇嚟《蘋果》一路煽暴，最終係多咗人暴力，但就幫唔到「飯民」囉。
有網民就諗起，之所以為出亂局，就係因為「議會失效」，而「飯民」就係「議會失效」嘅原因，「Jacky Fan」反問︰「議會已死，選舉仲有用嗎？」「北歐心科學」就揶揄「飯民」︰「有錢。」「Henry Lee」就話︰「必須先清算『泛民主派』，沒有一個是無辜的，光速報應！」
有見俾人鬧爆，《蘋果》記者陳珏明就出post認衰仔，話「血債票償」一句係出自佢手筆。雖然一邊話「不完美，不可接受，要改善」，但佢依然聲言「寫下這四字時，出於希望把整場運動的一些能量轉移到未來都很重要的選舉去」，繼續話要「光復」議會，叫大家唔好割席喎。
呢篇文亦都俾人貼咗上「連登討論區」，唔少人當然唔收貨，「仲王」直言︰「道歉完但講到尾咪又係想搞選舉。」「上條當麻」話︰「潛移默化用血債票償洗你腦，無人出黎（嚟）×既（嘅）話就成功爭取用選票黎（嚟）搞散水了。」「一鋪過」亦話︰「呢個時候仲掛住選舉真係無人性。」
「伯特蘭．羅素」表示︰「《蘋果》講咗血債票償幾個月啦，見到就嬲，冇人性！即係『烈士』出命換你就有票有議席有糧出，食人血饅頭，痴（黐）線！」■香港文匯報記者 甘瑜