■家燕姐分享人生的高山低谷。香港文匯報訊 薛家燕日前出席由仁德慈善基金舉辦的「廿四美分享會」，分享人生的高山低谷。
家燕姐婚後一度息影，其後由幕前轉到幕後做錄影帶生意，更是第一批港人到馬來西亞做錄影帶，家燕姐說：「嗰時我同朋友一齊做錄影帶生意，我攞咗無綫同麗的嘅劇集代理權，個市場好大，但啲翻版好犀利，曾經有人嚟到香港拍枱同我講『你嚟到馬來西亞因住！』去到馬來西亞有6個保鏢陪住我，住嘅酒店突然間熄晒燈，上台講嘢突然間冇晒電，好驚！我哋仲請咗緝拿翻版個阿頭，係一個警長嘅太太，佢喺屋企個花園洗車時，被人開兩槍，死咗！」
家燕姐四十幾歲離婚，她母兼父職養活3個子女，心大心細下重返無綫拍《真情》，全靠大女支持：「嗰陣係戰戰兢兢，因為一出返嚟就要做奸角，唔知點算！有一日珊珊就同我講『媽咪，咁你去拍啦！我會幫你照顧弟弟同妹妹！』，當時佢好細，識得咁同我講，我攬住佢喊，媽咪就係好想聽到有人支持。」
揚言要多謝前夫
她說之後遇上圈中好友黎小田︰「我喺惠天賜同斑斑的婚禮上撞見黎小田，佢一見我就問『Nancy，你離咗婚呀？早知就嫁畀我啦！有咩幫到你？』我就話，本來我想拍《真情》，但人工唔高，所以推咗。黎小田就幫我搵藝員科嘅總管Ben Chan，問佢『你做乜恰家燕？畀咁奀人工佢？』之後第二日珍姐就搵我，仲畀咗一個當紅小生嘅價錢我，哈哈！」
談到拍《真情》，雖然辛苦，但總算捱過，還令家燕姐東山再起，如果時光倒流，問家燕姐想改變什麼？她說：「我一生人係好開心嘅，之前有好嘅家庭，有個好嘅星運，3個好撐我、好為我着想嘅仔女，雖然離婚係最唔開心，不過倒返轉嚟講『冇呢個男人又點會有3個仔女呢？』初初好嬲佢，現在要多謝佢！嚟緊希望快啲抱孫，啲女快啲結婚啦！」