■古仔逼阿聰跳海。香港文匯報訊（記者 李思穎）張繼聰（阿聰）在電影《犯罪現場》中與偶像古天樂（古仔）結片緣。縱使被古仔「威逼」處男跳海，兼且有排洩物在身邊漂過，阿聰都毫無怨言，能夠近距離一睹古仔快艇上的風采比任何事都值得！
古仔、阿聰、宣萱、顏卓靈參演《犯罪現場》一片，將於10月24日在香港上映。阿聰在戲中其中一幕於馬灣被古仔威逼「下海」，獻上他從影第一次的跳海戲，雖然衛生環境欠佳，但他表示這是自己一個演藝生涯的里程碑，更搞笑地說因為是古仔逼他跳下去，所以自己沒有生氣，而且可以近距離欣賞到古仔的英姿覺得非常值得。
拍攝當日天氣相當「翳焗」，海水異常混濁，更不時有排洩物漂過，但阿聰非常敬業，沒半句怨言就跳入海中。其間他喝了不少又鹹又濁的海水，當上水後他一臉正經地說：「我今日征服咗呢一帶嘅海域，完全係浸淫同擁抱呢個大自然嘅質感裡面，感謝導演在炎炎夏日為我安排了一場透心涼的落水戲，每個出色嘅演員都有演過跳海戲，所以我算係完成咗個心願！」
憂快艇加速撞到阿聰
面對和偶像古仔演對手戲，阿聰流露出幸福的神情，笑說：「可以近距離欣賞到古天樂喺快艇上嘅英姿，令到我有一刻真係開心到想跳舞，雖然係佢逼我跳落去，不過我冇嬲佢。」鬼馬的阿聰浸入海水期間搞笑地游起韻律泳，哄得在場的劇組人員大笑。
面對張繼聰的主動「寬恕」，古仔笑說：「嗰場戲係導演寫佢跳落海，唔係我叫喎！我只係跟住劇本去演繹。」古仔本來很關心張繼聰跳海時的安危，但回憶起當時拍攝情況卻忍不住失笑：「一開始都會擔心嘅，點知佢一跳落去可以企喺度，原來嗰度好淺水，佢大半個身喺水面。」這場戲需要古仔開快艇離開，他坦言都有一定的難度以及危險度：「因為要我一下子將架快艇加速，咁隻船會好『擺』，有機會撞到阿聰，加上我又要就個航拍鏡頭，所以印象都幾深刻。」