十月一日國慶賽馬日總算喺有驚無險嘅氣氛下順利完成，賽前有人喺網上號召入場抗議，一度令人擔心賽事又要取消，最終馬會簡化晒所有場內節目同儀式，都係善意安排，事關當日全港多區形勢沸騰，馬場確係難得寧靜嘅一角，不過馬會管理層都見步步為營，應家柏承認一直密切留意各區公眾活動事態發展，會就情況作出應變安排。事實當日跑到較後場次，外面已經天翻地覆，港鐵封站越來越多，甚至成條荃灣綫都暫停服務，馬會都要考慮跑完尾場點疏散人群。另一方面，馬會亦有安排交通俾員工離開沙田馬場。據知，當日有揸車嘅員工，盡量送埋啱路嘅同事離開馬場。而馬會亦安排咗穿梭巴士，接載場內員工去沙田大學站轉駁其他交通工具。眼前嘅突發狀況，過去無發生過，馬會安排員工交通配套，唔夠完善亦可以理解，翌日亦收到唔少人士反映意見，應家柏亦從善如流，即刻吩咐相關部門跟進，日後安排員工巴士去多幾個唔同目的地。大機構本來就係有人力物力，預先做到一啲應變措施，包括員工穿梭巴士，好似應家柏咁會諗埋下屬處境嘅管理層，現實真係唔多。
今個馬季可以說是電子賽馬傳媒百花齊放的一年，無綫有線都相繼強化賽馬節目安排，無疑是令人有點意外，但對評馬業界而言當然是喜多於驚。其實最近十年評馬業隨傳媒業一起萎縮，遠遠沒有九七之前那麼風光，傳統傳媒大受互聯網打擊，再加上近期局勢動盪，當然亦會大減推廣宣傳開支，而廣告正正是傳統傳媒的命脈。不過隨着科技的發展，唔少依賴互聯網作傳輸渠道應運而生，現時最普及的方式是用OTT方式，利用已有的網絡傳輸服務，採用數碼制式，信號去到受方時，通常是採用一個俗稱機頂盒的解碼器將視聽內容還原。這些技術增添了很多可能性，但也有一些缺點，觀看一些時間性並不迫切的內容例如音樂與電影完全不成問題，但若是用來看賽馬直播，在信號調制至數碼、傳輸及解碼還原的過程中會出現時差，視乎所使用的制式、器材的功率等因素，這時差可以由幾秒至幾十秒不等。也就是說當你在畫面見到馬匹差不多全部入閘，按下投注傳送掣鈕的時候，馬匹實際上可能已經跑了半程，馬會的伺服器當然亦會回應拒絕受注訊息。這個樽頸對於像賽馬、財經這類節目是一個頗大的致命傷，而對於專業操盤人而言，若是遲了幾十秒才收到訊息，可能已是滅頂之禍，寄望未來5G時代能夠再帶來更多驚喜。
另外，智能手機令世界翻天覆地改變，賽馬媒體生態亦直接受到影響。刨馬工具唔再局限喺傳統嘅馬經，市面上都有唔少賽馬分析嘅Apps面世，將既有賽馬電子同印刷媒體嘅資訊，以手機Apps平台同馬迷交流。市面嘅賽馬Apps有收費有免費，質素亦良莠不齊，據悉其中一個早前上架嘅賽馬Apps，就主打刨馬工具呢瓣，個Apps做得相當唔錯，賽績資料齊全，除咗有馬會官方賽事片，新馬嚟港前嘅海外賽事影片都有得睇。網上資訊向來版權意識都非常薄弱，好多時都會手快貪方便，隨手就攞咗人哋啲影片嚟用。呢個資料齊全嘅賽馬Apps亦都一樣，原來佢哋海外賽事片段，未得到相關賽馬機構授權。據知有澳洲馬場法律部經過研究後，已經採取咗法律行動，向擅自挪用影片嘅賽馬Apps營辦者發出律師信，暫時都唔知點收科。講番香港馬會，由於媒體播馬係有規有矩嘅，現時播馬嘅媒體，每年都會清清楚楚俾返一筆可觀嘅轉播版權費馬會，據知早前亦有某本地媒體，有意喺�哋網上平台直播賽事，最終因為轉播費傾唔掂數唔成事。播馬嘅原則係公平嘅，馬會對侵權嘅行為當然會揸正嚟做。